Îromba n'ûntû bwa kûrigîîrua
Kîrî mûtongoria wa wini. Sabuuri ya Ndaundi.
64
1 Woû Ngai, thikîîria kûnung'una gwakwa, ngîkûromba.Ingûkuthûka anthû baakwa, ntuunyûkia batikaambûrage!
2 Mmenyeera kuumania na mîbango îtarî mîega ya bara bathûûku,
na kuumania na kîrîndî kîa bara barûthaga ûthûûku.
3 Batûmagîra ndîme ciao ta ndûûyiû inoore ikaûgîa
na bakagera biugo bithûûku wa ta bûra mûguîmi ageraga mîgwî.
4 Bagiitagîra antû bara beega bakabaratha na mîgwî,
babageraga mîgwî batarî na ûguaya.
5 Batitiganaga na mîbango yao îmîthûûku.
Babaangaga bûra bagaatega mîtego yao na witho bakiugaga,
“Gûtirî muntû agûtwona.”a
6 Barûthaga mîbango îmîthûûku bakauga,
“Tûkûbaanga mîbango na waara yabua mûno.”
Nkoro ya muntû na mathûgaania maake i ma witho mûno.
7 Îndî Ngai akabagera mîgwî yake,
na nthûti îmwe îbakirimanie îbarathe.
8 Akabathiria n'ûntû bwa biugo biithûûku
bira baarîîtie na tûnyua twao.
Bonthe bara bakaaboona nwa kwinainia bakainainia biongo biao bamakîîte.
9 Antû bonthe bakaamaka,
bakaathûgaania mantû ma bûra Ngai arûthîîte
na batûmîîrie mantû ma ngûgî ira Ngai arûthîîte.
10 Antû bara baagîru bonthe bagaakena n'ûntû bwa bûra Mwathani arûthîîte.
Bakoona bantû agwîciitha ndeeni yake,
antû bara beega bonthe bakamûkumia.