Kwîrirîîria Ngai
Sabuuri ya Ndaundi rîra aarî rwanda rwa Njunda.
63
1 Woû Ngai, i woû Ngai wakwa,na i ngûgûceria.
Kîrundu gîakwa igîgûkwîrirîîria,
nkoro yakwa îrî na bûûta ya mantû maaku
wa ta bûra nthîgûrû îmbûmo
na îtarî rûûyî îkaraga.
2 Ûreke nkwone ûrî bantû ara atheru,
na mbone bûra ûrî inya na ûkumio bûgana.
3 N'ûntû wendo bwaku bûra bûtathiraga bûrî na gîtûmi nkûrûki ya gûtûûra mwoyo,
kwoogu ngagûkumia.
4 Ngaatûûra ngûcookagîria nkaatho bunka ndî mwoyo,
na ngaûkîîria njara ciakwa ngîkûromba.
5 Nkoro yakwa îkaabaa, mpaa ta ya muntû ûra arîîte îrugaani.
Na ngakuinagîra nkeneete ngîgûkumagia.
6 Inkûririkanaga wa mmaami ûrîrî bwakwa,
na ngakûthûgaanîria ûtugû bunthe,
7 n'ûntû wîgîîtue ûrî ûteethio bwakwa.
Mbinaga na gîkeno ndî ruungu rwa mathabu maaku.
8 Nkoro yakwa îkaraga îrûmanîîrîîte naawe,
na njara yaku îra îrî inya, n'yo îmenyagîîra.
9 Îndî bara bacwaga kûûmbûraga
bakeendama bathi kwa bara bakuû.
10 Bakaûragîrwa ndûani,
na biimba biao bikaarîîwa i nyamû cia kîthaka.
11 Mûnene agaakena n'ûntû Ngai akamwaa ûûmbani.
Bara baigaga wîrane bwao na riîtwa rîa Ngai bakamûkumia,
îndî tûnyua twa bara baaragia ûrongo tûgaakirua.