Kwîgwatia Ngai wenka
Kîrî mûtongoria wa wini Njenduthuni. Sabuuri ya Ndaundi.
62
1 I Ngai wenka akî nkoro yakwa yeetagîîra îkirîîrîîtie,wonokio bwakwa buumaga kîrî we.
2 N'we wenka rwara rwakwa rwa iiga na wonokio bwakwa,
n'we ûmbirigîrîîte, na ntikooro enyeenyua.
3 Bûkaithûkîra muntû ûmwe bwinthe
muntû atarî nwa inya, akari ta rwinci rûûgwîthu, mwanka rî?
4 Bûrîbaanga akî bûra bûûmba kûmûrutaruta
ûneneeni bwake.
Bûkenagua i mantû ma ûrongo.
Bwaragia biugo bia kûthaarimana na tûnyua,
îndî nkorooni cienu bûkarîrîkana.
5 I Ngai wenka mbetagîîra nkirîrîîtie,
n'ûntû wîrîgîîro bwakwa bûrî kîrî we.
6 N'we wenka rwara rwakwa rwa iiga na wonokio bwakwa,
n'we ûmbirigîrîîte, na ntikooro enyeenyua.
7 Wonokio bwakwa na gîtîîyo gîakwa birî kîrî Ngai.
N'we rwara rwakwa rwa iiga,
na n'we wîbitho bwakwa.
8 Antû baakwa, îtîgagiani Ngai magiita monthe.
Mwîrageeni mathîîna meenu monthe,
n'ûntû n'we wîbitho bwetû.
9 Antû bonthe bakathimwa bakari bûmwe. Baûthîîte ta mîruke,
bara barî îgweta na bara batarî, nwa bûmwe, i ba mana.
Na ûkabeekîra kîthimiini, gûtirî kîo bauma.
Barî amwe bonthe kûûtha kwao i ta îbua rîmwe rîa mîruke.
10 Bûtikaige wîtîgio bwenu bitinaani
kana bwîkumîria into bia gûtuunyana.
Kinya ûtonga bwenu bûkoongeereka,
bûtikaige mathûgaania meenu kîrî bu.
11 Kûrî rîo Ngai aarîîtie
na mbîgîîtue ûgu maita maîrî.
Atî inya n'ya Ngai,
12 na atî we, wendo bwake bûtigarûkaga.
Na mma ûkaa woora muntû kîewa gîake
kûringana na bûra akeegua arûthîîte.