Îromba n'ûntû bwa gûtuunyûkua kuuma kîrî anthû
Kîrî mûtongoria wa wini. Rwinwe na mwinîre wa rwîmbo rûra rwîtagwa, “Îrao rîa Kîrîîkanîro.” Sabuuri ya Ndaundi. Rîra aarûire na Aaramu Naaraimu na Aaramu ba kuuma Soba, na rîra Njoabu aacookire na aûraga Aendomu ngiri îkûmi na ciîrî kîbondeeni kîa mwonyo.
60
1 Ngai, n'ûtûtiganîrîtie, na watûnyagaaria,n'wîgîîtue ûthûûri i tiû îndî îîndî itû tûcookere.a
2 N'ûtûmîîte nthî yiinaina, na wamîatûrania,
tumania nkuû ciayo, n'ûntû nikwaragana.
3 N'ûtûmîîte antû baaku banyamaara mûno,
tûrîthi tûgîtûgûûgaga ta antû banyuîte ncoobi.
4 Bara bagûtîîyaga n'ûbamenyithîîtie,
kaingo beethara bakuthûka mîgwî ya anthû.
5 Twonokie na inya yaku,
na ûtûcookerie îromba rîetû kaingo antû bara wendeete batuunyûkua.
6 Ngai arî nyomba yake îra ntheru augîîte,
“N'ûntû ndî na inya nkaagaania nthî ya Sekemu
na ngaîre antû baakwa kîbondeeni gîa Sukothi.
7 Ngiriandi i gwakwa, wana Manase i gwakwa,
Eburaimu i ta nkoobia yakwa ya kûrigîîria kîongo,
Njunda i ta mûraagi wakwa wa ûnene.
8 Moabu i kîraî gîakwa gîa kûthambîra, îgaatuîka nkombo yakwa.
Nkaagiragia magûrû maakwa na Endomu.
Ngaûkia nkururo cia gîkeno n'ûntû bwa gûcinda Firisitia.”
9 N'ûû ûkambira taûni îra mbirigîre?
N'ûû agaantongoreeria aankinyithie Endomu?
10 Anga ti Woû Ngai, ûtûteeyanîrîîtie?
Naawe Ngai, ûtiithiiyania na njûûrî cietû cia ndûa?
11 Tûteethie gûcinda mûnthû,
n'ûntû ûteethio bwa muntû i bwa mana.
12 Ngai arî amwe naati tûkaûmbana,
n'we agaakinyangîra anthû beetû nthî.