Îromba rîa gûtuunyûkua kuuma kîrî anthû
Kîrî mûtongoria wa wini. Rwinwe na mwinîre wa rwîmbo rûra rwîtagwa, “Ûtikeenyangie.” Rîra Saûrû aatûmire antû bathi kûthigaana nyomba ya Ndaundi barî na mworooto wa kûmûûraga.
59
1 Mbonokia kuuma kîrî anthû baakwa, Ngai wakwa.Ndigîîria kuumania na bara baambithûkagîra.
2 Mbonokia kuuma kîrî bara barûthaga moothûûku,
na ûntuunyûkie kuuma kîrî aûragani.
3 Raitha wone, bûra baangitîrîîte beebithîîte baambûraga!
Antû babu baathûûku beethîranîîte amwe kaingo bangwata baandûtha bûra bakwenda.
Tûntû bwa bûra mbîyîîtie kana mbîtîîtie nwa ata,
4 kana n'ûntû bwa îbîtia ndûthîîte ningwa, Mwathani.
Ûkîîra wone na ûnteethie!
5 Woû, Mwathani Ngai Mwene Inya, ûrî Ngai wa Isiraeri.
Ncû ûkaanûkie mîgongo yonthe,
ûtikeegîîrue bara babaangaga mîbango ya kûrûtha ûthûûku kîao.
6 Bacookaga ûgoro,
bakîrurumaga ta kurû,
na bakîthiûrûûkaga taûni înu.
7 Barumanaga na mîgambo yao
îtemaga ta ndûûyiû,
bakîîbîîraga, “Gûtirî we ûûmba gûtwîgua!”
8 Îndî woû Mwathani, nwaka ûbathekagîîra,
n'ûnyûrûûntaga mîgongo yonthe.
9 Woû Ngai Inya yakwa, i woû wîbitho bwakwa,
inya yaku nwa yo ndaithîîte îgûrû.
10 Ngai wakwa, n'ûntû bwa wendo bwake bûra bûtathiraga, akaaya aambonokie,
agaatûma ntûûbatûûba i gîkeno i kwona anthû baakwa bagîcindwa.
11 Ûtikaabaûrage warîmwe, itû Ngai,
antû baakwa baaya kûriganîrua.
Banyagaarie na inya yaku na ûbacinde,
Woû Mwathani rong'o yetû.
12 Baroogwatîrwa wîkumiani kwao,
n'ûntû tûnyua twao twaragia wîyia, na biugo biao bionthe i bia wîyia,
n'ûntû barumanaga na bakeenania.
13 Bathirie na mûthûûro waku,
bathirie cwe.
Rîru antû bonthe bakaamenya atî Ngai n'athanaga ndeeni ya Isiraeri,
atî wathani bwake bûrî nthîgûrû yonthe.
14 Bacookaga ûgoro,
bakîrurumaga ta kurû
na bakîthiûrûûkaga taûni înu.
15 Baruruthaga bagîcwa irio,
na bakaruruma ta kurû baaga bia kûrîa babaa.
16 Îndî naani nkaina mantû ma inya îra ûrî,
wa rûkîîrî ngaakûyaga nainya mantû ma wendo bwaku bûra bûtathiraga.
N'ûntû n'wîthîrîîtwe ûrî bantû aakwa a kwîbitha
îgiita rîa thîîna.
17 Ngakwinîra nyîmbo cia gûgûkumia, Woû Ngai Inya yakwa,
n'ûntû, Woû Ngai, ûrî wîbitho bwakwa, Ngai ûra aambonagia wendo bwake bûra bûtathiraga.