Îromba n'ûntû bwa îkaanûkia rîa bara bathûûku
Kîrî mûtongoria wa wini. Rwinwe na mwinîre wa rwîmbo rûra rwîtagwa, “Ûtikeenyangie.” Sabuuri ya Ndaundi.
58
1 Biû aathania kûrî rîo bwaragia ntheto cia wagîru?I bûgiitagîra wora muntû îgamba bûra kûbatîîrue?
2 Arî, nkorooni cienu bûbaangaga moothûûku,
na bûkarûtha mantû ma ûgîti nthîgûrû înu.
3 Antû bara baathûûku babîtagia kuuma barî nda cia bagina,
baaragia ûrongo kuuma gûciarwa kwao.
4 Barî cûmû ta ya njoka,
bakari ta gîîko, mbûra matû îra îteegagua,
5 îtaûmba kwîgua muugio wa bara bamîciemaga
bamîkûûra magego.
6 Woû Ngai, unaangîra magego maao tûnyuani twao,
mîguara ya cimba inu cia biumîri mîkûûre, Woû Mwathani!
7 Barootherekeria mwîndamo mûtheri ta rûûyî muurooni,
bagakinyangîrwa nthî bakanyaara ta nyaki îrî njîraani.
8 Barookara ta îkonyo rîra rîîthûngagîria ntagaani rîkayeyûka,
na barookara ta kauno kara gatoonaga riûa.
9 Barookûûrîrwa nthî ta îria, mbere bamenya nwa ata.
Ngai akabathiria arî na mûthûûro ûmûnene mûno wa barî mwoyo.
10 Bara baagîru bagaakena rîra bakoona eeyia bagîkaanûkua,
bakathaamba magûrû na nthakame ya bara bathûûku.
11 Antû bakauga,
“Na mma kûrî na kîewa n'ûntû bwa bara baagîru,
na mma kûrî na Ngai ûra agiitaga magamba aaga nthîgûrû.”