Îromba n'ûntû bwa gûcwa ûteethio
Kîrî mûtongoria wa wini. Rwinwe na mwinîre wa rwîmbo rûra rwîtagwa, “Ûtikeenyangie.” Sabuuri ya Ndaundi rîra aakuthûkire Saûrû eebitha îkurunguuni.
57
1 Mbîgîîrua kîao, Ngai, mbîgîîrua kîao,n'ûntû nkoro yakwa yonaga wîbitho kîrî woû,
ngeeciitha mûgunyeeni wa mathabu maaku,
mwanka ibuubani bia wînyangia bikûrûke.
2 Ndîkayîra Ngai Ûra Arî Îgûrû Mûno,
Ngai, ûra aampeyaga bionthe bira ndî bata nabio.
3 Akaambîtîga arî gûku îgûrû na aambonokie,
agaaconorithia bara bambinyagîîria.
Ngai akaambonia wendo bwake bûra bûtathiraga na gwîtîgîka gwake!
4 Ncereereetwe n'anthû,
bara bakari ta cimba irî na yûûra rîa nyama cia muntû.
Magego maacio makari ta matumo na mîgwî,
ndîme cia cio ikari ta ndûûyiû imbûgî.
5 Ûrookumagua, Ngai, naagu îgûrû mûno!
Na ûkumio bwaku bwîgue bûrî nthî yonthe!
6 Anthû baakwa baantegagîra mûtego baangwata nau.
Nkoro yakwa niinyîîrîkîîte.
Beenjîîte îrinya njîraani yakwa,
îndî bo bongwa baagwa ku.
7 Nkoro yakwa n'îrikîrîîtie,
na ntienyenyeka.
Nkaina na ngûkumie.
8 Ûkîîra, mwoyo wakwa!
Ûkîîra, woû wandîndî na ngita!
Ngaûkîîra gacaitîrî.
9 Ngagûcookeria nkaatho, Woû Mwathani, gatîgatî ka mîgongo.
Ngakwinîra ngûkumie ndî gatîgatî ga antû.
10 N'ûntû wendo bwaku bûra bûtathiraga i bûkinyîîte îgûrû,
gwîtîgîka gwaku wakinya matuuni.
11 Ûrookumagua, Ngai, naagu îgûrû mûno!
Na ûkumio bwaku bwîgue bûrî nthî yonthe!