Kwîgwatia Ngai
Kîrî mûtongoria wa wini. Rwinwe na mwinîre wa rwîmbo rûra rwîtagwa, “Îcea rîrî kûraaya mîpuruuni.” Sabuuri ya Ndaundi. Rîra Afirisiti baamûgwatîîre Ngathi.
56
1 Itû Ngai, mbîgîîrua kîao, n'ûntû antû i bagûûnkinyanga,mûthenya unthe antû bara baameneete ibambinyagîîria.
2 Anthû baakwa bandangaga mûthenya unthe,
n'ûntû baingî barûaga naani beekumîîtie.
3 Rîra nkwîgua ûguaya,
Wîrîgîîro bwakwa bwîgagua bûrî kîrî woû.
4 Mbîtîgagia Ngai na ntikûmaka.
I nkûmûkumia n'ûntû bwa wîrane bwake.
N'ata muntû arî na mwîrî aûmba kûûndûtha?
5 Anthû baakwa bageragia kûmbîkîra thîînaani ntugû yonthe,
rîonthe babaangaga bûra bakanthûûkia!
6 Beethîranaga amwe, bakaagiitîra beebithîîte,
na bagatuîria bûra bunthe nkûrûtha,
beerîgîîrîîte kûûmbûraga.
7 Bakaanûkie woû Ngai, n'ûntû bwa ûthûûku bwao.
Thiria mîgongo na mûthûûro waku.
8 N'wiyî mathîîna monthe mara mboneete.
Meethori maakwa monthe mara ndaarooîtûûra n'ûmaiyî bûra magana!
Anga maandîkîîtwe îbukuuni rîaku?
9 Ntugû îra ngaagûkayîra,
anthû baakwa bagaacookua nyuma.
Mbiyî ûûgû n'ûntû Ngai arî rûteere rwakwa.
10 Ngai, ûra nkumagia kiugo gîake,
ndeeni ya Mwathani, ûra nkumagia kiugo gîake,
11 ndeeni ya Ngai ûra mbîtîgîîtie ntarî na ûguaya.
N'ata muntû aûmba kûûndûtha?
12 Woû Ngai, mîthiîtio îra nkûthiîtîrîîtie nwa mwanka mbûyûrie.
Ngakûrutîra biewa bia gûcookia nkaatho.
13 N'ûntû n'wonokeetie mwoyo wakwa kuuma gîkuûni,
na waarigîîria magûrû maakwa matikaabaratie,
kaingo nthiyagîra mbere ya Ngai
werûûni bûra bûthararagîra bara barî mwoyo.