Îromba rîa muntû akunyanîrîtwe i mûcoore
Kîrî mûtongoria wa wini. Rwinwe na inanda bia ndigi inyiingî. Sabuuri ya Ndaundi.
55
1 Îgua îromba rîakwa, Woû Ngai,na ûtikaambûndûkîrie mûgongo ngîkwereka.
2 Nthikîîria na ûûncookerie.
Mathîîna maakwa i maanthirîîtie inya.
3 I makîîte n'ûntû bwa kûthitimûrwa n'anthû baakwa,
na n'ûntû bwa kwinyîîrua n'antû bara bathûûku.
Bakaandetera thîîna
na bagaantuma ûthû bathûûri.
4 Nkoro yakwa n'îkwinyîîrîka mûno,
na ingûkuthûka gûkua.
5 Ngwetwe n'ûguaya na kainaino,
na makîîte mûno.
6 Ndeebîîra ata rî, “Ta ûkeegua ndî na mathabu ta îcea,
mbuurûûka nkathi kûnogoka.
7 Nkuthûka nkathi kûûraaya
na ngaatûûra rwanda.
8 Mbugia nkathi gwîcereria bantû a kwîbitha,
ruuo rûrû rûneneete ûûgû na kîbuubani kîene.”
9 Înyangia mîbango ya anthû baakwa Mwathani, rigicania ndwaria ciao,
n'ûntû inkwona mantû ma ûgîti na rûmena taûniini.
10 Bamîthiûrûkaga ûtugû na mûthenya beekirimîîtie na nthingo ciayo.
Ûthûûku na thîîna biûyûri ku.
11 Kûrî na wînyangia bantû onthe gûku ndeeni.
Tûyîra twa taûni înu tûûyûri winyanîîria na gûceganîîra.
12 Ûkaaya kwîgua i mûnthû ûûnyûrûûntire,
nkîûmîîria.
Ûkeegua i mûnthû akûûmbîkumîria,
nkîmweba nkeebitha atikaambone.
13 Îndî i woû, muntû wa nthuke yakwa,
woû tûkaranagia naawe, na mûcoore wakwa wa ndeeni.
14 I twaragia bwega na tûgwatanîrîte mûno,
tûthiiyanîîtie na bara bangî Nyomba ya Ngai.
15 Anthû baakwa barooyîîrwa i gîkuû kagiita kaao gatakinyîîte.
Baroothûngîra nthikooni barî mwoyo,
n'ûntû ûthûûku bûrî mîciîni yao na nkorooni ciao.
16 Îndî ngeeta Ngai,
na Mwathani akaambonokia.
17 Rûkîîrî, îkira nyoni na ûgoro,
nung'unaga na nkarîra i kîeba,
n'we akeegua kayû gaakwa.
18 Agaancookia ndî mayîîga
kuuma ndûani ira ndûaga
na anthû baingî.
19 Ngai, ûra atûûraga aathanaga tene na tene,
akaambîgua na abakaanûkie,
n'ûntû batiendaga kûgarûka,
na batimûkuthûkaga.
20 Mûcoore wakwa wa ndeeni aithûkîîre acoore baake,
eenyangia kîrîîkanîro gîake.
21 Rwaria rwake rwarî mûrîo ta ûkî,
îndî rûmena nwa rwarî nkorooni yake.
Biugo biake biarî binyoorooku ta maguta,
îndî bitemaga ta mpiû ikûûrîîtwe njûraani imbûgî.
22 Neenkanîra mathîîna maaku kîrî Mwathani,
n'we agaakûmenyeera.
Gûtirî rîo arekagîîria antû bara eetîgua beenyeenyua.
23 Îndî woû, Ngai, ûkabagera
îrinyaani rîra rîorokeru mûno.
Aûragani na arongo
batiitûûra nucu ya ûtûûro bwao.
Îndî niû ngagwîtîgia.