Îromba rîa kûrekerwa na kûtherua
Kîrî mûtongoria wa wini. Sabuuri ya Ndaundi. Rîra kîroria Nathani aamûriûngîîre nyuma ya Ndaundi kûrûtha ûthûngîîri na Bathiseba.
51
1 Mbîgîîrua kîao, Woû Ngai,n'ûntû bwa wendo bwaku bûra bûtathiraga.
N'ûntû bwa kîao gîaku kîînene,
nthambia meeyia maakwa.
2 Nthambia mabîtia maakwa monthe,
na ûntherie wîyia bwakwa!
3 N'ûntû imbiyî mabîtia maakwa,
na meeyia maakwa rîonthe i maririkanaga.
4 I woû wenka mbîyîrîîtie, na gûtirî ûngî,
na ndaarûtha ûthûûku meethooni maaku.
Kwoogu n'wagîrîte wa kûûngambithia,
na woû ûtirî na mabîtia ûkîngitîra îgamba.
5 Na mma niû ndaaciarirwe ndî na wîyia,
kuuma ndî nda ya maitû, mbîthîrîîtwe ndî mwîyia.
6 Woû wendaga nkoro ya muntû îîgua îrî na ûmma,
kwoogu ndutana mantû ma ûûme nkorooni yakwa.
7 Nthambia na ucopo, na nkaathera.
Nthambia, na nkaathera ce nkûrûki ya îra.
8 Reka mbîgue tûyû twa gîkeno na kûgwîrua,
na ûreke maîndî mara ûthithirîîte makene.
9 Itha ûthiû bwaku ûtikoone meeyia maakwa
na ûtherie mabîtia maakwa monthe.
10 Mbûmbîra nkoro întheru ndeeni yakwa, Woû Ngai,
na ûtûme ntuîke mwîtîgua kaîrî.
11 Ûtikaambîîngatie kuuma ara ûrî,
na ûtigaantunye Kîrundu Ûmûtheru waku kuuma kîrî niû.
12 Ncookeria gîkeno kîra kiumanagia na wonokio bwaku,
na ûtûme mbîgua ndî na wendo bwa gûkwathîkîra.
13 Rîru nkaarutana eeyia maathana maaku,
nabo bagagûcookera.
14 Mbonokia kuumania na mabîtia magûtûûra nthakame, Woû Ngai,
Woû Ngai ûra ambonokagia,
na nkaina nainya ngwîrîîtue nkiugaga bûra woû wagîrîîte bûgana.
15 Woû Mwathani, mbûûmbithia kwaria,
na ngagûkumia.
16 Woû ûtiendaga igongwana, ngîkûrutîra bio,
ûtikenagua n'igongwana bia kûbîîthua.
17 Kîgongwana kîra Ngai endaga i nkoro îmbunîkangu,
nkoro îmbunîkangu na îkwîrira,
woû Ngai ûtimîrega.
18 Itû Ngai, îgîîrua Sayuuni kîao na ûmîteethie.
Cookeeria gwaka nthingo cia Njerusaremu.
19 Rîru ûgaakenua n'igongwana bira biagîrîîte,
na igongwana bietû bia kûbîîthua.
Rîru ncamba cia kiumîri ikaarutîrwa kîthînjîrooni gîaku.