Kûgonga Ngai kwa mma
Sabuuri ya Asabu.
50
1 Mwathani, Ngai, Mwene Inya yonthe arîaria,ageeta nthîgûrû
kuuma uumîîrooni bwa riûa kûthi ûthwîrooni bwa rîo.
2 Ngai nathararîîte arî Sayuuni,
taûni îmbagîru na înthongi.
3 Ngai wetû n'ayîîte, îndî twaka akiri ki.
Atongorereetue i mwanki ûkîrîrîmbanaga kûrîrîmbana,
kîrûngûyû kîa mwanki kîmûthiûrûkîîrîte.
4 Eetaga îgûrû
na nthîgûrû ikûûyîîra akîgambithia antû baake.
5 “Mbîthîranîria antû baakwa bara eetîgua,
bara baigire kîrîîkanîro naani na njîra ya kûûndutîra kîgongwana.”
6 Îgûrû riugaga Ngai n'ûmwagîru,
n'ûntû we wengwa i mûgambithania!
7 “Thikîîriani, biû antû baakwa, mbwîre,
woû Isiraeri, nkaarûngama mbuge n'ûbîtîîtie.
Niû i niû Ngai, Ngai wenu!
8 Ntibûgondokagîra n'ûntû bwa igongwana bienu,
kana n'ûntû bwa igongwana bia kûbîîthua bira bûûndutagîra rîonthe.
9 Ntirî na ûbatu bwa ncamba cia ng'ombe kuuma gwaku,
kana mbûri kuuma kiugûûni gîaku.
10 N'ûntû nyamû cia kîthaka cionthe i ciakwa,
kinya ng'ombe ira irî irîmaani ngiri na ngiri.
11 Nyoni cia îgûrû cionthe i nciiyî,
na nyamû cionthe ira ithiiyagîra nthî i ciakwa.
12 Ûkeegua nkûrî na yûûra, ntikîbwîra,
n'ûntû nthîgûrû na bionthe bira birî ku i biakwa.
13 Anga niû i ndîîyaga nyama cia ng'ombe,
kana nyua nthakame ya mbûri?
14 Rutîra Ngai kîgongwana gîa gûcookia nkaatho,
na wingie wîrane bwaku kîrî Ûra Arî Îgûrû Mûno,
15 na ûûmbîte ntugû îra ûrî na thîîna.
Naani ngagûtunyûkia, na ûgaankumia.”
16 Ngai arîûria muntû ûra mûthûûku ata rî,
“Ûrî na gîtûmi kîrîkû gîa kûgweta maathana maakwa
kana kwaria mantû ma kîrîîkanîro gîakwa?
17 Woû nûthwîre mawatho maakwa,
na ûtirî bata na ûrutani bwakwa.
18 Wona mwamba, ûtuîkaga mûcoore wake,
na ûkagîa ngwatanîro na athûngîîri.
19 Rîonthe waaragia mantû maathûûku,
rîonthe rûrîme rwaku rûtungaga ûrongo.
20 Ûkaraga nthî ûkaguuta mûruanyûkwe,
ûgacaambia mûruanyûkwe ûra bwareere nda îmwe n'we.
21 Mantû mamu monthe ûmarûthîîte wa nkiri,
kwoogu wathûgaanagia nkari ta woû.
Îndî îîndî i ngûkûgondokera,
na nkuumbûrîre mabîtia mara ûrûthîîte.
22 Tathikîîriani bwega, biû bara bûregeete Ngai,
kana wegua t'ûgu mbûteembûraange na gûtirî we akaabûteethia.
23 Ûra areetaga kîgongwana gîa gûcookia nkaatho n'antîîyaga.
Ûra ûthiiyaga na mîthiîre îmîega
nkamwonia wonokio bwa Ngai!”