Waa bwa kwîgwatia ûtonga
Kîrî mûtongoria wa wini. Sabuuri ya aana ba Kora.
49
1 Thikîîriani mantû mama, biû antû bonthe!Kindaani gûtû, biû bwinthe bûtûîre nthîgûrû,
2 bara barî îgweta na bara batarî,
itonga na nkîa barî amwe!
3 Kanyua gaakwa gakaaria biugo bia ûûme,
na mathûgaania ma nkoro yakwa makeeyana ûmenyo.
4 Ngaatega gûtû gwakwa nthikîîrie njuno,
ngaataûra njuno ciakwa na nyîmbo nkîringaga kînanda.
5 Ntimakaga magiita ma thîîna
rîra Ncîgîîrîîtue n'anthû,
6 na antû baathûûku bara beegwatagia ûtonga bwao
na bageekumîîria bûra ûtonga bûbu bwao bûrî bwingî.
7 Muntû atiûmba gwîkûûraa wengwa,
kana aneenkera Ngai gîntû eegûrîra mwoyo wake nakîo,
8 n'ûntû ûgûri bwa ûtûûro bwa muntû i bûûnene mûno
Kîra aûmba kûrea gîtigana nwa aniini,
9 kaingo muntû ûyu atûûra tene na tene
atagûkua.
10 Muntû wonthe noonaga kinya antû bara baûme i bakuuyaga.
Biaa na kinya ngîti bikuuyaga bûmwe
na bagatiga ûtonga bwao na antû bangî.
11 Nthiko ciaob i cio ituîkaga mîciî yao tene na tene,
ûtûûro bwao kîrî nthuke cionthe,
wana kinya ûkeegua kûrî rîo baarî na ithaka biao biongwa.
12 Ûtonga bwa muntû bûtiûmba kûmwonokia kuuma gîkuûni,
nwa agaakua wa ta bûra nyamû ikuuyaga.
13 Îno n'yo njîra ya bara barî na kwîbîtîgia gwa ûtaku,
na ya bara beegwatagia ûtonga bwao.
14 Baathûrîrîîtwe gîkuû ta ng'ondu,
na gîkuû gîgaatuîka mûrîîthi wao.
Bara baagîru bakabaatha,
na mîîrî yao îkoora na mpwî îrî kwa bara bakuû,
kûûraaya na mîciî yao.
15 Îndî Ngai akaambonokia kuumania na inya ya gîkuû,
n'ûntû akaanthagaana.
16 Ûtikeegîîrue muntû rûriitho aatonga,
mwago wa mûciî wake wongeereka.
17 N'ûntû gûtirî kîo akaathi nakîo rîra agaakua,
ûtonga bwake bûtiîkanîîrua n'we nthikooni.
18 Wana wegua rîra aarî mwoyo n'etaraga arî ûmûthaarime
na antû bakamûkumia n'ûntû bwa bûra athiîte na mbere bwega,
19 Nwa mwanka agaakua wa ta bûra beethe baao baakuire,
bara batakooro boona werû kaîrî.
20 Ûtonga bwa muntû bûtiûmba kûmwonokia kuuma gîkuûni,
nwa agaakua wa ta bûra nyamû ikuuyaga.