Sayuuni, taûni ya Ngai
Sabuuri ya aana ba Kora.
48
1 Mwathani n'ûmûnene na n'wa gûkumagua mûno taûniini ya Ngai wetû!Kîrîmaani gîake kîîtheru.
2 Sayuuni, kîrîma kîa Ngai, i kîîraaya na kîîthongi mûno.
Taûni ya mûnene ûra arî îgweta mûno, n'yo gîkeno kîa nthîgûrû yonthe.
3 Ngai noonanîîtie n'we arî na ûkaria bwa mma
ndeeni ya nyomba ciake cia nthingo i nkamu.
4 Anene beethîranire amwe
baaya kwithûkîra Kîrîma gîa Sayuuni.
5 Îndî bagûkîona ûgu, baarigara,
baagwatwa n'ûguaya na baugia baakuthûka.
6 Baagwatirwe i kainaino wagu wagu,
na baagwatwa n'ûrûrû, ta bwa mûrimo wa mwekûrû arî akubî kûgîa na mwana.
7 Wa ta rîra meeri cia Tarisisi
ciabunjûrangirwe i ruuo rwa uumîîrooni bwa riûa.
8 Itwîgîîtue bûra Ngai arûthîîte,
na woogu nwabu twona
taûniini ya Mwathani Mwene Inya yonthe,
taûniini ya Ngai wetû.
Ngai atûûraga amîmenyereete tene na tene.
9 Tûrî ndeeni ya Nyomba yaku, Woû Ngai,
tûthûgaanagia îgûrû rîa wendo bwaku bûra bûtathiraga.
10 N'ûkumagua n'antû gûntû kunthe,
na nkuma yaku n'îkinyîîte nteere cionthe cia nthîgûrû.
Wathanaga bûra kûbatîîrue.
11 Ga antû ba Sayuuni bagwîrue!
Woû ûgiitaga magamba bûra kûbatîîrue,
kwoogu ga kwîgue kûrî na gîkeno taûniini cia Njunda!
12 Antû ba Ngai, thiûrûkaani Sayuuni,
na bûtare irîngo bira birî ku.
13 Raithani nthingo ciayo,
na bûcûnkûûne nyomba ciayo cia kwîbitha, ira ciakîîtwe na nthingo imbitu,
kaingo bûûmba kwîra nciarwa cienu ira ikaaya ûûgû,
14 “Ngai Ûyû i Ngai wetû tene na tene,
n'we agaatûtongoragîîria magiita monthe mwanka tene na tene.”