Ngai n'we mûnene wa nthî yonthe
Kîrî mûtongoria wa wini. Sabuuri ya aana ba Kora.
47
1 Ringaani mpî n'ûntû bwa gîkeno bwinthe antû ba mîgongo!Inîraani Ngai nyîmbo cia gîkeno na kayû kaaraaya!
2 N'ûntû Mwathani, Ûra Arî Îgûrû Mûno, n'wa kûmakania,
Mûnene arî îgweta mûno ûra aathaga nthî yonthe.
3 N'aatweere inya ya gûcinda anthû beetû,
na aatûma tûtua kwatha mîgongo.
4 N'we aatûthuurîîre nthî îra tûtûûraga îrî rûgai rwetû,
rûgai rûra rûrî îgweta rwa Njakubu, ûra eendeete.
5 Ngai agwîtia îgûrû gîtîîni gîake kîa ûnene,
Mwathani eetia agîkûngûagîîrwa na tûrumbeeta tûkîringagwa.
6 Inîraani Ngai nyîmbo cia kûmûkumia.
Inaani nyîmbo cia gûkumia mûnene wetû!
7 N'ûntû Ngai n'we mûnene wa nthî yonthe,
mûkumieni na nyîmbo!
8 Ngai akarîrîte gîtî gîake kîîtheru kîa ûnene.
Aathaga mîgongo yonthe.
9 Anene ba mîgongo beethîranaga amwe
batuîke antû ba Ngai wa Îburaîmu.
Arî inya nkûrûki ya njûûrî cia ndûa cionthe,
na aûkîîrîîtue îgûrû mûno!