Ngai arî amwe naati
Kîrî mûtongoria wa wini. Rwîmbo rwa aana ba kora. Rwinwe na mwinîre wa rwîmbo rûra rwîtagwa “Aramothi.”
46
1 Ngai n'we wîbitho bwetû na inya yetû,ûteethio bûrî oogo rîonthe îgiita rîa thîîna.
2 Kwoogu tûtiimaka wana mwinaino wa nthî waya,
kana irîma biagwa îriani ndeeni.
3 Kinya ndûûyî ciakuûkana na ciaruruma,
na kinya irîma biainaina.
4 Kûrî na muuro ûra mîthîîra yau îreetaga gîkeno taûniini ya Ngai,
kîrî nyomba îra ntheru ya Ûra Arî Îgûrû Mûno.
5 Ngai arî taûni înu, na îtikooro yenyeenyua.
Ngai akaaraûka kûmîteethia rûkîîrî tene.
6 Mîgongo n'îmakîîte, moonene i mainainie,
Ngai agondokaga, nthîgûrû îgakaanjûka.
7 Mwathani wa Njûûrî arî amwe naati.
Ngai wa Njakubu n'we wîbitho bwetû.
8 Ncûûni bwone mantû mara Mwathani arûthîîte,
bûra atûmîîte nthîgûrû îîgua îrî maganjo.
9 N'athiragia ndûa nthîgûrû yonthe,
akaunanga nta, na akagiitanga matumo tûcuncî tûcuncî,
na akabîîthia nkaarî cia ndûaa na mwanki!
10 Auga ata rî, “Tigaani kûrûa, na bûmenye niû i niû Ngai.
Ngai ûra atîîyîîtwe i mîgongo yonthe,
na nthîgûrû yonthe!”
11 Mwathani wa Njûûrî arî amwe naati.
Ngai wa Njakubu n'we wîbitho bwetû.