Rwîmbo rwa kwinîra mûnene akîgûrana
Kîrî mûtongoria wa wini. Rwinwe na mwinîre wa rwîmbo rûra rwîtagwa, “Maûa.” Rwîmbo rwa aana ba Kora rwa mûranû.
45
1 Nkoro yakwa n'yûûyûri biugo biega,nkiinîra mûnene rwîmbo rûrû.
Rûrîme rwakwa rûrîthiingatania biugo ta karamu ka mwandîki ûmûûgî.
2 Kîrî nthaka cionthe i woû mûthongi nkûrûki.
N'wiyî kwaria bwega mûno.
Kwoogu Ngai n'akûthaarimîîte tene na tene.
3 Îîboge rûûyiû kauna, woû mûnene ncamba,
mwagooni waku na ûneneeni bwaku!
4 Ûrî ûneneeni bûbu bwaku, ûthiiyage ûrî mbaraathiini ûkîûmbanaga,
ûkîrûagîîra ûmma, ûbooreeru na wagîru.
Inya yaku îrookwaa ûûmbani bûûnene.
5 Mîgwî yaku n'îmîûgî, n'îmuntîîte nkoro cia anthû baaku.
Mîgoongo nwaka îkûgwa magûrûûni maaku.
6 Wathani bûra Ngai akwete, bûtikooro bûthira rî kana rî.
Wathanaga ûgîtûmagîra ûmma.
7 Wendeete wagîru, ûtiendeete ûthûûku.
Na i kîo n'ûntû Ngai, Ngai waku, akûthuurîîte na agwîtûûrîria maguta,
na akwaa gîkeno nkûrûki ya bara bangî.
8 Nguo ciaku cionthe inuunkaga mîtaa ya manemane na aroi.
Aini nabo bagagûkenia na nyîmbo bakîringaga wandîndî
barî nyomba igemeetue na mîguongo.
9 Aarî ba anene i bamwe ba arûngamîîri baaku ba gîtîîyo,
na rûteere rwaku rwa ûrîo noogo mwikia waku arûûngi eekîrîîte nguo cia thaabu ya kuuma Ofiri.
10 Nthikîîria bwega, mwiki wa mûnene,
kuuma îmunthî, riganîrua n'antû beenu na antû ba mûciî wenu.
11 Ûthongi bwaku bûgaatûma mûnene akwîrirîîria.
N'we mwathi waku, kwoogu nwa mwanka ûmwathîkagîre.
12 Mwarî ûyû aumîîte taûni ya Turo, antû ba Turo bagakûretera biewa.
Antû bara itonga bagakûretera biewa kaingo beebeendithia kîrî woû.
13 Mwiki arî nyomba ya mûnene ndeeni, n'we athoongamage!
Nguo yake îtumîîtwe na ndigi cia thaabu.
14 Akairwa kwa mûnene eekîrîte nguo înthongi mûno,
athingatîîtwe n'arûngamîîri baake ba aarî, acoore baake
na kinya bo baareetwa kwa mûnene.
15 Bakairwa kûrî na gîkeno na kûgwîrua
na bathûûngîre nyomba ya mûnene.
16 Woû, mûnene, ûkaagîa na nthaka inyingî ira ikaathûkia twanya twa biûyûûyû bienu barî anene,
na ûkabatuîkithia anene ba nthîgûrû yonthe.
17 Rwîmbo rûrû rwakwa, rûgaatûma ûririkanwa i nciarwa cionthe,
na kwoogu antû bagagûkumagia tene na tene.