Îromba n'ûntû bwa kûrigîîrua
Kîrî mûtongoria wa wini. Rwîmbo rwa aana ba Kora.
44
1 Itwîgîîtue na matû meetû, itû Ngai,ba baaba beetû i batwîrîîte,
mantû mara waarûthire kagiitaani kaao,
ntugûûni cia karaaya.
2 Woû wengwa wengatiirie mîgoongo îra yagoongaga ngai cia ûrongo,
na waatûma ba baaba beetû batûûra gûntû gûku.
Wakaanûkia mîgongo înu îîngî
na waneenkera antû baaku biewa biega.
3 Antû baaku bataagwata nthîgûrû înu na rûûyiû rwao,
kana bamîtuunyana na inya yao.
Îndî i kwa inya yaku,
na bûra beetîgîîtie ûrî amwe nabo, na wonania atî n'ûbendeete.
4 Nwa woû mûnene wakwa na Ngai wakwa,
i woû ûnenkagîra antû baaku ûûmbani.
5 Gûkûrûkîîra inya yaku, itûûmbaga kûûmba anthû beetû,
na gûkûrûkîîra riîtwa rîaku tûgakinyangîra nthî bara batuithûkagîra.
6 Ntiîtîgîîtie ûta bwakwa,
kana rûûyiû rwakwa bimbonokia.
7 Îndî woû n'ûtwonokeetie kuuma kîrî anthû beetû,
na watûrûîrîîra kîrî bara batûthwîre.
8 Tûgagûkumagia rîonthe
na tûgaatûûra tûgûcookagîria nkaatho tene na tene.
9 Îndî îîndî n'ûtûtiganîrîtie na watûrekeeria twacindwa.
Mwanka agu ûtithiyanagia na njûûrî cietû cia ndûa.
10 N'watûmire twaûndûkîria anthû beetû mûgoongo twabakuthûka,
na baataa bira biarî bietû.
11 N'wetîgîîrie twathînjwa ta ng'ondu,
watûnyagaaria gatîgatî ka mîgongo îmîgeni.
12 Wendiirie antû baaku na ûgûri bûûkuû,
ta antû ûtaarî na bata nabo, na gûtirî baita woona.
13 Waatûma tûtuîka ba kûmenwa n'antû bara tûtûûranîrîîte nabo,
na twatuîka ba kûnyûrûntwa na kûthekeerwa i bo.
14 N'ûtûtuîkithîîtie gîntû gîa kûthekeerwa i mîgongo,
batuinainagîria biongo bagîtûthekeera.
15 Mbîgagua ndî na îgi rîonthe,
na ngakunîkîrwa ûthiû bwakwa i nthoni,
16 kuumania na mîtego na irumi
bia anthû baakwa na bara banthwîre.
17 Mama monthe i makarîkîîte kîrî tiû,
wana kinya ûkeegua tûtiriganîrîîtue i woû
kana tuuna kîrîîkanîro kîra warîîkanîîre naati.
18 Nkoro cietû itaagûtiganîria,
kana tûtiga kwathîkîra maathana maaku.
19 Amwe na ûgu watûkanyakanyire watûtiganîria gatîgatî ka nyamû cia kîthaka,
na watûkunîkîra na mwindu wa gîkuû.
20 Ûkaaya kwîgua itûtigîîte kûgonga Ngai wetû
na twaromba ngai îîngeni,
21 na mma wîgua ûmenyeete,
n'ûntû n'wiyî mathûgaania meetû ma witho.
22 Gûtirî ntugû tûtaûragagwa n'ûntû bwaku.
Antû batwonaga ta ng'ondu cia kûthînja.
23 Mwathani, Ûkîîra! I kî n'ûntû ûmaami?
Ncû! Ûtigaatûtiganîrie tene na tene.
24 I mbi n'ûntû wîbithîîte?
Ûtikaariganîrue i kînyamaara gîetû na mathîîna meetû!
25 N'ûntû itûîngumanîîte nthî mûthetuuni,
tûkamaama nthî tîîriini.
26 Ncû Mwathani ûtûteethie!
Tûkûûre n'ûntû bwa wendo bwaku bûra bûtathiraga.