Gîkeno gîa kûrekerwa meeyia
Sabuuri ya Ndaundi.
32
1 Kîthaarimo i kîrî muntû ûraarekeretwe meeyia,
ûra mabîtia maao macaamîrîtwe.
2 Kîthaarimo i kîrî muntû ûra Mwathani
atatarîrîte meeyia maake
na ûra nkorooni yake gûtarî na ûrongo.
3 Rîra nteerirîîte meeyia maakwa,
mwîrî wakwa wathiranîîtie
kuumania na gûkaya n'ûrûrû mûthenya unthe.
4 N'ûntû bwa Mwathani gûnkaanûkia mûthenya na ûtugû,
ndaathirîrwa n'inya cwe,
ta bûra kîthitha kînyaaraga thaano.
5 Ndacooka ndakuumbûrîra meeyia maakwa,
na ntaitha mabîtia maakwa.
Ndauga, “Nkaumbûrîra Mwathani
mathûûkia maakwa ntakuitha,”
naawe wandekera
meeyia maakwa monthe.
6 Kwoogu muntû wonthe ûra mûtheru,
n'akûrombe îîndî ûkwonara,
kaingo thîîna ciaya ciakondoria ta rûûyî rwa mûguû,
itakîmûkinyîra.
7 I woû wîbitho bwakwa,
ûkandigîîria ntikoone thîîna,
na ugancîgîîria na nyîmbo cia kûgwîrîrua gûkûûrwa gwakwa.
8 Mwathani ariuga, “Ngagûtongoria na nkûrutane njîra îra ûbatîîrue ûthiiyaga n'yo.
Ngakweyaga kîrîra na nkûraithîîrie bwega na meetho maakwa.
9 Bûtigaakare ta mbaraathi kana nyûmbû,
n'ûntû cio iticiûkagîrwa.
Cio ciîkagîrwa mîkang'i na mîkanda ya kanyua,
kaingo ciathîka.”
10 Bara bathûûku bakanyamaara mûno,
îndî bara beerîgagîîra Mwathani
i baarigîîrie i wendo bwake bûra bûtathiraga.
11 Kenaani na bûgwîrue ndeni ya Mwathani,
biû bara baagîru,
Inaani, bwinthe bara bûrî na nkoro intambûrûku.