Îromba n'ûntû bwa kûrigîîrua
Kîrî mûtongoria wa wini. Sabuuri ya Ndaundi.
31
1 I kîrî woû Mwathani ngûceria wîbitho.Ûtikaareke ngîa îgi,
n'ûntû bwa wagîru bwaku ntuunyûkia.
2 Kiinda gûtû ûnthikîîrie,
ûnteethie na mpwî!
Tuîka ta rwara rwa iiga kîrî niû rîa kwîbitha,
rûthiingo rûûriku, ûmbonokie.
3 N'ûntû woû i ta rwara rwa iiga kîrî niû na ûrî wîbitho bwakwa,
n'ûntû bwa riîtwa rîaku ntongoragia na ûûmbathage.
4 Ûmenyeere ntikaagwe mûtegooni ûra ntegeetwe nau,
n'ûntû i woû wîbitho bwakwa.
5 Ndaiga mwoyo wakwa ûmenyeerini bwaku,
nkûûra woû Mwathani Ngai wa mma.
6 N'ûthwîre bara barombaga ngai cia ûrongo,
îndî niû ingwîtîgîîtie.
7 Nkaagwîrua na nkene
n'ûntû bwa wendo bwaku bûra bûtathiraga.
N'woneete kînyamaara gîakwa na wathikîîria gûkaya gwakwa.
8 Ûtaarekeeria anthû baakwa baangwata,
na wampa kaanya ga gûkinyîra nthî wa ara nkwenda.
9 Mbîgîîrua kîao, Mwathani,
n'ûntû ndî na thîîna îmbîî.
Meetho maakwa i manogeete i kûrîra mûno, na nogeete nkathirania cwe.
10 Ûtûûro bwakwa i bûtuîkîîte bwa kîeba,
na kûrîra kwathîga matugû maakwa.
Inya yakwa îrîthira n'ûntû bwa ûthûûku bwakwa,
na maîndî maakwa maathira inya.
11 Anthû baakwa bonthe, na mûno mûno atûûri baakwa,
baantuîkithîîtie gîntû gîtarî gîtûmi.
Bara baambiyî i bagûnkuthûka,
baambona njîraani, bakaugia bakaûra.
12 Antû i baariganîîrue i niû, ta muntû wakuire.
Ndaakara ta nyûngû înkuû.
13 Inkwîgua nguutû imbingî ciakwa,
kîmako i gîncerereete.
Barîbaanga mîbango îgûrû rîakwa,
bakîenda kûûmbûraga.
14 Îndî naani, n'wa woû mbîtîgîîtie, Mwathani.
Ndiuga, “Woû ûrî Ngai wakwa.”
15 Rîonthe ndî ûmenyeerini bwaku,
ntuunyûkia kuuma kîrî anthû baakwa,
na kuuma kîrî bara baanyamaaragia!
16 Rekeeria ûthiû bwaku bûnthararîre niû mûruti ngûgî waku,
ûmbonokie n'ûntû bwa wendo bwaku bûra bûtathiraga!
17 Ûtikaareke Mwathani ngîa îgi,
n'ûntû i woû ngûkayîra.
Rekeeria bara bathûûku bagîe îgi barî bo,
barekeerie baremwe i kwaria na bakue.
18 Tûnyua tûra twaragia ûrongo tûrootumana tûgatuîka maamu,
tûra twaragia na wîkumia,
na gûcaambia bara batheru.
19 N'ata wega bwaku bûrî bûnene,
bûra waigîrîte antû bara bagûtîîyaga,
bara beebithaga kîrî woû,
n'ûbarûthîrîte mawega maingî antû bakîonaga.
20 Ûbaithaga ara woû ûrî,
ûkabaathûrana na antû bara bababaangagîra mantû mathûûku.
Ûkabaitha bantû ara eega gîkaroni gîaku,
rîra bakûrumangwa n'anthû baao.
21 Mwathani arookumua,
n'ûntû bwa kûmbonia wendo bwake bûra bûtathiraga
rîra ndaarî ntûûra îra yacîgîîrîîtue n'anthû.
22 Indaamakîîte na ndaathûgaania atî,
n'aambîngatîîtie ndauma meethooni maake.
Îndî n'eegiirue kîrîro gîakwa,
rîra ndamûkayîîre aanteethia.
23 Endaani Mwathani biû bwinthe atheru baake,
Mwathani n'amenyagîîra bara bamwîtîgîtie,
îndî n'akaanûkagia eekumia bûra kûbatîîrue.
24 Kwoogu îgîani inya na bûûmîîrie,
biû bwinthe bara bwîrîgagîîra Mwathani.