Îromba rîa gûcookia nkaatho
Sabuuri ya Ndaundi ya kûthaarimithia Nyomba ya Ngai.
30
1 Ngagûkumia Mwathani,n'ûntû bwa kûmbonokia wagiria nkua.
Na n'warigîîrie anthû baakwa batigankinyange.
2 Itû Mwathani, Ngai wakwa i ndagûkayîîre ûnteethia,
na wamboria.
3 N'wambonokiirie kuuma nthikooni.
Waagiria ntikoorokerue îrinyaani rîa bara bakuû.a
4 Inaani nyîmbo cia gûkumia Mwathani, biû atheru baake!
Bûkîmûcookagîria nkaatho, n'ûntû bwa mara arûthîîte.
5 Mûthûûro wake n'wa kagiita gaakai,
îndî wega bwake bûkaraga kagiita konthe ka ûtûûro bwa muntû!
Meethori nwa meetîge ûtugû bunthe,
îndî gwakea rûkîîrî gîkeno gîkaaya.
6 Naani, rîra ndaaganîîrwe ndauga,
“Ntikooroenyenyua kinya rî.”
7 N'ûntû bwa wega bwaku, Mwathani,
n'wandûngamiirie ndaarika ta kîrîma.
Ûgûcooka wa itha ûthiû bwaku,
i ndathaangîkire mûno.
8 Ndacooka ndagûkayîra, Mwathani,
wa woû Mwathani, i woû ndaarombire nkiugaga,
9 “Îîndî ndaakua rî, i baita mbi ûkoona kuumania na gûkua gwakwa?
I mbi ûkoona ndî nthikooni?
Bara bakuû rî, baûmba gûgûkumia?
Î kana rî, nwa batûmîîrie wega bwaku kîrî antû ba nthîgûrû?
10 Nthikîîria, Itû Mwathani na ûmbîgîîrue kîao!
Nteethia, Itû Mwathani.”
11 N'ûgarûrîîte kîeba gîakwa gîatuîka gîkeno gîa gûkwinîra,
wanguûra mathango,b na wanguîka gîkeno ta nguo.
12 Kwoogu ntiikira, ngakuinîra na ngûkumie.
Mwathani, woû ûrî Ngai wakwa, ngagûcookagîria nkaatho tene na tene.