Kayû ka Mwathani karî na inya înene mûno
Sabuuri ya Ndaundi.
29
1 Kumiani Mwathani biû araîka ba îgûrû,kumiani mwago wake na inya yake.
2 Kumiani Mwathani n'ûntû bwa ûkumio bwa riîtwa rîake.
Gongaani Mwathani ûkumioni bwake bûûtheru.
3 Kayû ka Mwathani i gakwîguîka îgûrû rîa ndûûyî,
Ngai wa ûkumio nakûthandîka ta nkwa.
Mwathani n'akûthandîka îgûrû rîa îria rîînene mûno.
4 Kayû ka Mwathani kaûyûri wathani,
kayû ka Mwathani kaûyûrîîte ûnene.
5 Kayû ka Mwathani ikaunangaga mîthithinda,
Mwathani n'aunangaga mîthithinda ya Rebanoni.
6 N'atûmaga irîma bia Rebanoni bitûûbatûûba ta kayaû
na irîma bia Sirioni bigatûûba ta ncamba ya mbogo.
7 Kayû ka Mwathani karutaga ndîrîmbî cia mwanki,
ikûyica ta rweni rûkîenia.
8 Kayû ka Mwathani gatûmaga rwanda rwinaina.
Mwathani n'ainainagia rwanda rwa Kandesi.
9 Kayû ka Mwathani i gatûmaga mîpuru iinaina,a
na gagatûma mîtî yûûrûrûka mathangû.
Na bonthe barî Nyomba ya Mwathani bakaugîîria bakiugaga, “Ûkumio i kîrî Ngai!”
10 Mwathani akari gîtîîni gîake kîa ûnene akîathaga gûkondoria kwa ndûûyî,
aathanaga arî mûnene tene na tene.
11 Mwathani n'eyaga antû baake inya!
Mwathani n'athaarimaga antû baake agatûma batûûra na ûkiri!