Îromba n'ûntû bwa gûcwa ûteethio
Sabuuri ya Ndaundi.
28
1 I Woû ngûkayîra, Mwathani rwara rwakwa rwa iiga,thikîîria kîrîro gîakwa!
N'ûntû ûkarega kûnthikîîria ûncookeria,
mbîgua ndî bûmwe na bara beendamaga îrinyaani bathi kwa bara bakuû.
2 Îgua kayû ga kîrîro gîakwa,
rîra ngûwîîta ûnteethia,
rîra ndaûkîîria njara ciakwa,
mberekereetie bantû aaku ara atheru mûno.
3 Ûtikaangiitîre îgamba bûmwe na bara bathûûku,
amwe na bara barûthaga ûthûûku,
bara baaragia biugo biega beebuithîîtie,
îndî bo baûyûrîîtwe i rûmena nkorooni ciao.
4 Bakaanûkie kûringana na bûra barûthîîte,
na kûringana na ûthûûku bwa ngûgî ciao.
Bakaanûkie kûringana na ngûgî ya woora muntû.
Baneenkere kîra kîbabatîîrie.
5 N'ûntû bo batithûgaanagîria ngûgî cia Mwathani,
kana ngûgî cia njara ciake.
Kwoogu akabakaanûkia,
na abathirie tene na tene.
6 Mwathani arookumua,
n'ûntû akwîgua kayû gaakwa nkîmwereka aanteethia.
7 Mwathani n'we inya yakwa na rong'o yakwa.
I mwîtîgîîtie na nkoro yakwa yonthe, na n'anteethagia.
Nkoro yakwa n'ûyûrîîtwe i gîkeno.
I mûcookagîria nkaatho na ndwîmbo cia nkena.
8 Mwathani n'eyaga antû baake inya,
na akeeyana ûcindi kîrî mûnene mwîtûûrîrua maguta wake.
9 Onokia antû baaku, Mwathani, na ûthaarime antû baaku bongwa!
Antû ba Isiraeri, bara barî antû ba Ngai bongwa.
Batongoreerie wa ta bûra mûrîîthi atongoragîîria ng'ondu ciake,
na ûbamenyeere tene na tene.