Îromba rîa gûkumia
Sabuuri ya Ndaundi.
27
1 Mwathani n'we werû bwakwa na wonokio bwakwa,n'ûû we nkuthûka?
Mwathani n'andigagîîria kuuma moogwatiini monthe,
n'ûû we ngaakuthûka?
2 Rîra bara bathûûku baayaga bakîenda kûûmbûraga,
batarataraga bakagwa.
3 Kinya nkathiûrûkîîrwa i njûûrî ya ndûa,
ntiimaka,
kinya nkaithûkîrwa n'anthû,
nwa nkaathi na mbere gwîtîgia Ngai.
4 I mbûûrîîtie Mwathani ûntû bûmwe,
na i bu ngûcwa,
nabu i gûtûûra Nyomba ya Mwathani,
ûtûûrooni bwakwa bunthe,
nkaarigaraga ndî agu wegaani bwake,
na nkamûûragia aantongoragie.
5 Îgiita rîa mathîîna akaandigagîîria,
akaamenyagîîra ndî Nyomba yake,
na akaambîtithia rwaraani rwa iiga îgûrû,
aamenyeere.
6 Kwoogu ngaacinda anthû,
bara bancereereete.
Nkiugagîîria nainya na gîkeno ndute igongwana ndî Nyomba yake întheru.
Ngaakumagia Mwathani, nkîmwinagîra na kûmûgonga.
7 Mbîgua, Mwathani ndagwîta!
Mbîgîîrua kîao na ûûmbîtîge!
8 Ûkuuga, “Ncû ûûngoonge,”
Ndacookiirie ndauga, “Nkaaya Mwathani.
9 Ûtikeebithe mbûya gûkwaga!”
Ûtikeengatie mûruti ngûgî waku ûthûûri,
ûtûûraga ûgînteethagia.
Ûtikaambûndûkîrie mûgongo, ûûntiga,
Woû Ngai, mwonokia wakwa.
10 Baabu na maama nwa bantiganîrie,
îndî Mwathani akaamenyeera.
11 Mwathani, ndutana njîra yaku,
na ûntongoreerie njîraani îra yagîrîîte,
n'ûntû bwa anthû baakwa.
12 Ûtikaandekanîrie na anthû baakwa,
n'ûntû barîntuîrîîra mantû ntaarorûtha
na bagaantiibûkîra na inya.
13 Îndî amwe na ûgu imbiyî,
nkoona wega bwa Mwathani
ndî wa aaga nthîgûrû ûtûûrooni bûbû tûrî.
14 Îtîgia Mwathani.
Îgua ûrî na wîtîgio, ûtigaakue nkoro.
Eteera Mwathani.