Îromba n'ûntû bwa gûtongoreerua na kûrekerwa
Sabuuri ya Ndaundi.
25
1 Itû Mwathani, nwa woû mbîrîgîîrîîte na ingûkûromba,2 ingwîtîgîîtie, Ngai wakwa.
Ûtikaareke ngîa îgi,
ûtikaareke anthû baakwa baaya gûncinda baankururîra.
3 Ûtikaareke bara beegwatagia woû bagîa îgi,
îndî bara bakaagîa îgi i bara bageragia kûrongoithia bara bangî.
4 Mbonia njîra ciaku Mwathani,
ûndutane gûcithingata bûra kûbatîîrue.
5 Ntongoreeria na ûmma bwaku na ûndutane,
n'ûntû i woû Ngai mwonokia wakwa.
Wîrîgîîro bwakwa bûrî kîrî woû ntugû yonthe.
6 Mwathani, ririkana kîao gîaku na wendo bwaku bûra bûtathiraga,
n'ûntû wonaniirie bio kuuma wo tene.
7 Ndekera wîyia,
na mabîtia ma wîthî bwakwa,
kûringana na wendo bwaku bûra bûtathiraga, ndirikana
n'ûntû bwa wega bwaku, itû Mwathani.
8 Mwathani n'ûmwega na arûthaga bûra kûbatîîrue,
kîrî bara babîtagia njîra, naboonagia njîra ya mma ya kûthingata.
9 N'atongoragîîria bara babooreeru bûra kûbatîîrue,
akîbarutanaga bûra eendaga bakara.
10 Njîra cia Mwathani cionthe i cia wendo bûra bûtathiraga na cia mma,
n'ûntû bwa bara baigaga wîrane bwake na kwathîkîra mawatho maake.
11 N'ûntû bwa riîtwa rîaku Mwathani,
ndekera ûthûûku bwakwa n'ûntû i bwingî mûno.
12 Bara batîîyaga Mwathani
bakeerutana kuumania n'we njîra îra babatîîrue bathingata.
13 Mwathani akabaneenkagîra into biega rîonthe,
na aana baao bagaatûûra nthîgûrû înu îtuîke rûgai rwao.
14 Mwathani i mûcoore wa bara bamwathîkagîra,
na n'atûmaga bamenya kîrîîkanîro gîake.
15 Meetho maakwa rîonthe maraithaga Mwathani aanteethia,
na n'we aantuunyûkagia nkauma thîînaani.
16 Ndaitha Mwathani, na ûmbîgîîrue kîao,
n'ûntû ndî ninka na i nkûnyamaara.
17 Mathîîna maakwa nwaka ma kwongeereka,
nteethia ûndute kuuma kîrî mo monthe.
18 Raitha mîthangîko yakwa na kinya bûra nyamaarîîte,
ûndekere meeyia maakwa monthe.
19 Raithîîria bûra ndî na anthû bagana,
wone bûra baameneete bûgana.
20 Ûûmenyeere na ûntuunyûkie,
ûtikaareke ngîa îgi,
n'ûntû i woû ndîgwetie.
21 Weega na wîtîgio bitûûre naani,
n'ûntû ingwîtîgîîtie.
22 Woû Ngai, kûûra antû baaku ba Isiraeri,
baume thîînaani ciao cionthe.