Ngai i mûnene ûra mûnene
Sabuuri ya Ndaundi.
24
1 Nthîgûrû n'ya Mwathani, na bionthe bira birî ku.Nthîgûrû na bonthe bara batwîre ku i baake.
2 N'ûntû aanjîîrie mîcingi yayo rûûyîîni rwa îria,
amîaka amîrikithia îgûrû rîa rûûyî rwa miuro.
3 N'ûû wagîrîîte wa gwîtia kîrîmaani kîa Mwathani?a
N'ûû ûûmba kûrûngama bantû agu aake atheru?
4 N'ûra arûthaga bûra kûbatîîrue, na ûra arî na nkoro întheru,
ûra atagoongaga mîbuanaano,
kana aiga wîrane bwa ûrongo.
5 Mwathani akamûthaarima na mantû meega,
Ngai Mwonokia wake akamwagîrithia.
6 Antû bara baayaga kwa Ngai bakari ta babu,
bara bagoongaga Ngai wa Njakubu.
7 Rugûkaani cwe, biû mîrango ya mîîrîga!
Biû mîrango ya woo tene, rugûkaani
kaingo mûnene wa ûkumio athûûngîra ndeeni.
8 N'ûû we mûnene wa ûkumio?
I Mwathani ûra arî inya na n'we ncamba,
I Mwathani ûra ncamba ya ndûa?
9 Rugûkaani cwe, biû mîrango ya mîîrîga!
Na bûrugûke cwe, biû mîrango ya woo tene,
kaingo mûnene wa ûkumio athûûngîra ndeeni.
10 N'ûû we mûnene ûyû wa ûkumio?
I Mwathani wa Njûûrî,
we n'we mûnene wa ûkumio.