Gûcookia nkaatho n'ûntû bwa kûûmba mûnthû
Kîrî mûtongoria wa wini. Sabuuri ya Ndaundi.
21
1 Mûnene n'agwîrîîtue, Itû Mwathani, n'ûntû n'ûmwete inya,n'akeneete n'ûntû n'watûmire aûmba anthû.
2 Woû, Ngai, n'ûmwete bionthe bira nkoro yake îîriragîîria,
n'ûmûcookeretie maromba maake.
3 Wathagaanire mûnene na wamwaa into biega,
na wamwîkîra nkoobia ya ûnene ya thaabu kîongo.
4 Aakûrombire mwoyo, na wamwaa uu,
wa gûtûûra tene na tene.
5 Mwago wake n'ûmûnene n'ûntû bwa bûra ûmûteetheetie,
n'ûmwete ûnene bûrî na îgweta na mwago ûmûnene.
6 N'ûtûmîîte apa antû baake into biega tene na tene.
N'ûmûkeneetie mûno n'ûntû ûrî amwe n'we.
7 Mûnene n'etîgîîtie Mwathani Mwene Inya,
na gûkûrûkîîra wendo bûra bûtathiraga bwa Ûra Arî Îgûrû Mûno
atienyenyeka.
8 Mûnene ageekîra anthû baake bonthe njaraani,
akaagwata muntû wonthe ûra amûmeneete.
9 Akaabathiria bakare ta mwanki ûkûrûngûria nyaki
rîra akoonekana.
N'ûntû bwa mûthûûro wake, Mwathani akabameria,
na mwanki ûbarûngûrie.
10 Gûtirî nwa ûmwe wa rûrîîyo rwao agaatigara,
mûnene akaabathiria bonthe.
11 Bakaamûbangîra bamûûraga,
îndî batiûmbana.
12 Akaabagera mîgwî yake
na atûme bacooka nyuma na bakuthûka.
13 Itûgûkumagia Mwathani, n'ûntû bwa inya yaku îînene!
Tûkaina tûgîkumagia inya yaku.