Îromba n'ûntû bwa kûûmbana
Kîrî mûtongoria wa wini. Sabuuri ya Ndaundi.
20
1 Mwathani aroogwîtîga ntugû îra îrî ya thîîna!Ngai wa Njakubu arookûmenyagîîra!
2 Arookûreetera ûteethio kuuma bantû aake ara atheru,
na agagwîkagîra inya arî Sayuuni!
3 Aroîtîgîîria biewa biaku bionthe,
na agakeneera igongwana biaku bia kûbîîthia!
4 Arookweyaga bira nkoro yaku yîîriragîîria,
na agatûma mîbango yaku yonthe yûûyûra!
5 Rîru naati tûkaaringa nkemi cia gîkeno n'ûntû bwa kûûmbana gwaku,
na tûkûngwîre ûûmbani bwaku bûûnene tûgîkumagia Ngai wetû.
Mwathani aroogûcookeria maromba maaku monthe!
6 Îîndî inkûmenya Mwathani agateethia mwîtûûrîrua maguta wake.
Akamwîtîga arî îgûrû bantû aake ara atheru,
na kwa inya yake akaa mûnene ûûmbani bûûnene.
7 Bamwe beekumagia na nkaarî ciao cia ndûa, bara bangî na mbaraathi ciao,
îndî tiû twîkumagîria riîtwa rîa Mwathani Ngai wetû.
8 Antû ta babu bagaataratara na bagwe,
îndî tiû tûgaûkîîra tûrûngame twîrikîîtie.
9 Itû Mwathani, nenkera mûnene ûûmbani,
na ûtwîtîgage rîra twagwîta.a