Ûkumio bwa Ngai na watho bwake
Kîrî mûtongoria wa wini. Sabuuri ya Ndaundi.
19
1 Îgûrû irîonanagia ûkumio bwa Ngai,maanganyoni namo, makoonania bûra Ngai ûyu arûthîîte.
2 Wa ntugû antû i baûmbaga kwona mantû ma ûkumio bwa Ngai,
na wa kîra ûtugû bakoona bûra Ngai arî mûnene.
3 Gûtirî rwaria kana biugo bitûmagîrwa,
na gûtirî kayû keeguîkaga,
4 îndî kayû kaao ikeeguîkîîte bantû onthe nthîgûrû.
Biugo biao ibikinyîîte gûntû kunthe mîthia ya nthî.
Na i kîrî bio,
Ngai aambîrîîte riûa îrema,
5 ara riumaga rîkari ta mûgûrani akiuma nyomba yake,
na ta muugia rwîro eeteereete kuugia.
6 Kuuma kwa rîo, riumagîîra mîthiani ya îgûrû,
na rîkagiitania rîkumbûkîîte mwanka mûthia wabio,
na gûtirî gîntû n'wa kîmwe kîthiîkagwa gîteegue mûrugutîra warîo.
7 Watho bwa Mwathani i bwagîru,
i bûriûkagia nkoro ya muntû
ûkûûyî bwake i bwa gwîtîgîka,
i bûtûmaga kîa kîûgîa.
8 Moorutani ma Mwathani i maagîru,
na bara bamaathîkagîra i bakenaga.
Maathana ma Mwathani i maatheru,
na imatûmaga muntû aciûkîrwa i mantû bwega.
9 Gûkuthûka Mwathani i kûûtheru,
gûgaatûûraga tene na tene,
Mwathani agiitaga magamba bûra kûbatîîrue,
na kûgiita magamba gûku gwake ikwagîru rîonthe.
10 Mantû mamu i mathongi na makwîrirîîrua nkûrûki ya thaabu,
îra îkembeetwe bwega,
marî mûrîo nkûrûki ya ûkî,
bûra bûkûnyûûrûûka kuuma magwani.
11 I mampeyaga ûmenyo, niû mûruti ngûgî waku,
na kûrî na kîewa kîînene kuumania na kûmaathîkîra.
12 Îndî rî, n'ûû ûûmba kûmenya mabîtia maake?
Mwathani, nthambia meeyia mara ndûthaga ntakûmenya.
13 Ûtikaareke niû mûruti ngûgî waku ndûtha meeyia ma ûtûrîka,
ûtikaareke matûûra mambathîîte!
Kaingo ntûûra ntarî na mabîtia,
ntarî na rûko rwa meeyia.
14 Biugo biakwa na mathûgaania maakwa ûroometîgîîria,
woû Mwathani, Rwara rwakwa rwa iiga na mûkûûri wakwa.