Ndaundi aina rwîmbo n'ûntû bwa ûûmbani
(2Sam 22:1-51)
Kîrî mûtongoria wa Wini. Sabuuri ya Ndaundi. Ndaundi n'aarîîrie Mwathani na biugo bia rwîmbo rûrû kagiita kara Mwathani aamûtunyûkiirie kuuma njaraani cia Saûrû na anthû bara bangî bonthe.
18
1 Inkwendeete mûno, Mwathani, Woû inya yakwa,2 Mwathani n'we Rwara rwakwa rwa iiga, wîbitho bwakwa na mûntuunyûkia,
Ngai wakwa, Rwara rwakwa rwa iiga noogo ndîîbithaga,
i rong'o na inya ya wonokio bwakwa na ûgwato bwakwa bûûriku.
3 Mbîtaga Mwathani, ûra ûbatîîrue kûgongagwa,
n'we agaantuunyûkia kuuma kîrî anthû baakwa.
4 Moogwati ma gîkuû imanthiûrûkîîte,
na mîkumbîîrî ya wînyangia n'îîmakîîtie.
5 Mîtego ya nthiko n'îndigicîîte nteere cionthe,
na mîtego ya gîkuû n'îîngwete.
6 Ndî kînyamaaraani gîku ndaarîrîra Mwathani,
Ndeeta Ngai wakwa anteethia.
Eegua kayû gaakwa arî Nyomba yake,
na kîrîro gîakwa gîakinya matûûni maake.
7 Rîru nthîgûrû yainaina nainya mûno,
kinya mîcingi ya irîma yenyeenyua,
n'ûntû Ngai n'aathûûri.
8 Nyiûrû ciake ciatua kuuma ntoogo îgîîtagia,
mwanki wakûrûngûria warîrîmbana ûkiumaga kanyua gaake,
makara maatuune tunî maatua kuuma ku.
9 Aarugûra îgûrû, na eendama nthîgûrû,
na ruungu rwa mbayo ciake kwagîa mwindu ûmûrumanu.
10 Aakarîra mûraîka ûra mûnene aabuurûûka,
aayire na mpwî abuurûûkîîtue arî mathabuuni ma ruuo.
11 Eekunîkîra na mwindu,
wa matu ma mbura mara mayirû ta muntû eeguîkîîte na nguo.
12 Kuumania na werû bûra bwarî mbere yake,
kwauraga mbura ya maiga na makara ma mwanki kuuma matuuni mamu maake.
13 Mwathani aagondoka arî îgûrû,
na kayû ka Ûra Arî Îgûrû Mûno keeguîka gakari ta mbura ya maiga na makara ma mwanki.
14 Aagera mîgwî yake, na aanyagaaria anthû babu baake,
aatûma rweni rwake rwenia mûno, na abanyagaaria.
15 Rîra wagondokeere anthû baaku, Mwathani,
na watiiba mîruke na nyiûrû ciaku,
mborokero cia îria cionekana
na mîcingi ya nthîgûrû yatigwa bûûrîîni.
16 Aataambûrûkia njara aankuyîîria arî kûra îgûrû, aangwata,
aanduta rûûyîîni rûru ruingîîte ûgu.
17 Aantuunyûkia kuuma kîrî mûnthû wakwa ûra aarî na inya,
na kuuma kîrî bara banthwîre, n'ûntû i baarî na inya nkûrûki yakwa.
18 Baambithûkîîre ntugû îra ndaarî na thîîna,
îndî Mwathani n'we aantuunyûkia.
19 Aandutire thîînaani aambumîria bantû eega,
aantunyûkiirie n'ûntû i ndaamûkenagia.
20 Mwathani anthaarimire na mantû meega n'ûntû indûthaga bûra kûbatîîrue,
kûringana na ûtheru bwa njara ciakwa n'anthaarimire.
21 N'ûntû i mbathîkîrîîte watho bwa Mwathani,
na gûtirî rîo ndatiganîria Ngai wakwa ndûtha ûthûûku.
22 N'ûntû i ndaathîkîîre bûra bunthe mawatho maake maugîîte,
na ndaathîkîra maathana maake.
23 Ntwîre ntarî na mabîtia mbere ya Mwathani,
na nkîmenyagîîra ntikaabîtie.
24 Kwoogu Mwathani n'anthaarimire n'ûntû ntirî na mabîtia,
na kûringana na bûra atoona ndûthîîte ûntû bûthûûku na njara ciakwa.
25 Woû Mwathani, ûrî Mwîtîgua kîrî bara eetîgua kîrî woû,
na ûrî ûmwega cwe kîrî bara batarî na mabîtia.
26 Kîrî bara batheru wibonanagia ûrî mûtheru,
îndî kîrî bara barûthaga ûthûûku wibonanagia ûrî mûthûûku mûno.
27 N'wonokagia bara beenyiiagia,
îndî bara beekumagia n'ûbairaga îgi.
28 I Woû Mwathani, ûtûmaga taa yakwa yakana bwega,
i woû ûthiragia mwindu wakwa.
29 I woû ûmpeeyaga inya ya gûkinyanga na nkathontoria njûûrî ya anthû baakwa,
na n'ûntû bwa inya yaku n'wa nthûngûthe rûthiingo.
30 Ngai ûyû, njîra yake n'îmbagîru.
Wîrane bwa Mwathani i bwonanagia i bwa mma.
Wee i ta rong'o,
kîrî bonthe bara bamûcwaga abarigîîria.
31 I ka tûrî na Ngai ûngî, tatiga Mwathani?
Na n'ûû ûngî rwara rwa iiga, tatiga Ngai wetû?
32 Ngai woyu n'we ûmpeeyaga inya,
na agatûma mîthiîre yakwa îkara bwega.
33 N'we atûmaga magûrû maakwa mayiûa ta ma nthwariga,
na akamenyeera ndî irîmaani îgûrû.
34 N'we aandutanaga mantû ma ndûa,
kaingo njara ciakwa ciûmba gûkuuyia ûta bûûmo mûno bwa rûthuku.
35 N'ûmpeete rong'o ya wonokio bwaku,
na wantirîîra na njara yaku ya ûrîo,
na ûteethio bwaku bwatûma neneua.
36 N'ûmbengûragîra njîra,
na ntiitaratara.
37 Ndenganire na anthû baakwa ndabagwatagwata,
na ntaacooka nyuma mwanka rîra ndaabathiriirie bonthe.
38 Ndabamunta na rûûyiû ndababuura na batikîûmba gûkîîra kaîrî,
baagwîre baatungumana agu mbere yakwa.
39 N'ûntû n'wampete inya ya kûrûa,
na waatûma mbûûmba gûcinda anthû baakwa.
40 N'watûmire anthû baakwa baambûndûkîria mûgongo baankuthûka,
na ndaathiria bara baameneete.
41 I baakayire bateethua, îndî batoona wa kûbateethia,
i baarîrîîre Mwathani, îndî ataabeegua abacookeria.
42 Ndaabakinyangire bakara ta tîîri îra yûmbûragwa i ruuo.
Ndabakinyaanga ta ntaga njîraani.
43 I woû wambonokiirie kuuma kîrî antû bara bambithûkagîra,
wantuîkithia mûnene wa mîgongo,
antû ntaiyî baatua gûntûmîkagîra.
44 Antû ageni baayaga mbere yakwa beenyiîtie,
Beegua nkuma yakwa ûgu, bakaambathîkîra,
45 Ageni babu nabo baatemûka nkoro n'ûguaya,
na baumbûka bauma ara beebithîîte baaya bakiinainaga
46 Mwathani arî mwoyo, Rwara rwakwa rwa iiga arookumagua,
aroogongagwa Ngai ûyu wa wonokio bwakwa.
47 Ngai ûra aandîanagîria,
kîrî anthû baakwa, na agatûma bara barî ruungu rwakwa baambathîkîra,
48 ûra aantunyûkiirie kuuma kîrî anthû baakwa.
Yîî, na aatûma mbûûmba gûcinda bara banthwîre,
aandigîîria antû bara batûmagîra taka.
49 N'ûntû bwoogu, Woû Mwathani, ngagûkumagia gatîgatî ka mîgongo,
na ngakwinagîra ngîkumagia riîtwa rîaku.
50 N'ûnenkerete mûnene waku ûûmbani bûûnene,
na ûkoonania wendo bwaku bûra bûtathiraga kîrî mwîtûûrîrua maguta waku,
kîrî Ndaundi na nciarwa ciake tene na tene.