Îromba rîa muntû ûmwagîru
Îromba rîa Ndaundi.
17
1 Mwathani, thikîîria kîrîro gîakwa ngîcwa ûmma,na ûthikîîrie kîrîro gîakwa.
Tega gûtû gwaku wîgue îromba rîakwa,
rîra rîkuuma kanyuani gatarî na ûrongo.
2 Ngiitîra îgamba rîakwa ûrî woû wengwa,
ka meetho maaku maraithe moone bûra kûbatîîrue.
3 Woû n'wiyî nkoro yakwa, n'ûndiûngîrîte kinya ûtugû
wancûnkûûna cwe,
na ûtoona ûthûûku ndeeni yakwa,
nani ingiitîîte îgamba atî kanyua gaakwa gatiîyia.
4 N'ûntû bwa mantû mara antû barûthaga,
niû ntwîre mbathîkagîra mawatho maaku,
na ndaaregana na mîtugo ya bara bathûûku.
5 Magûrû maakwa rîonthe marûmîîrîîte njîra ciaku,
na mbayo ciakwa itaarotaratara.
6 Îî Mwathani, i woû ngwîta n'ûntû ûkambîtîga,
kiinda gûtû wîgue bûra nkuuga.
7 Onania wendo bwaku bûra bûtathiraga,
woû wonokagia na njara yaku ya ûrîo
bara baceragia wîbitho ndeeni yaku kuuma kîrî anthû baao.
8 Mmenyeera ta kaana ka riitho,
ûmbithe mûgunyeeni wa mathabu maaku,
9 ntikaaye kwonwa n'antû bara bathûûku bambithûkagîra,
anthû baakwa bara bakaraga bancîgîîrîîtie.
10 Batirî kîao,
na baaragia na kang'antaaro.
11 Baceranagia naani wa ara onthe nkaathi, îîndî ûûgû ibancîgîrîîtie,
bagîcwaa kaanya kaingo baanturania nthî.
12 Bo bakari ta cimba îrî na yûûra,
ta cimba îrî na inya îgiitîrîte
13 Ncû, Itû Mwathani! Ûkomane na anthû baakwa ûrûe nabo ûbakîrie inya ûbature,
ntuunyûkia na rûûyiû rwaku kuuma kîrî ûra mûthûûku.
14 Ntuunyûkia na njara yaku, itû Mwathani,
kuuma kîrî antû bara ûtûûro bwao bûrî bwa nthîgûrû îno akî.
Baroorîyaga na bakabaa bira ûbaigîrîte,
bagatigarîria aana baao, nabo bakarîa bakabaa,
na bagatigarîria booyûûe.
15 Îndî niû, ngakwona na meetho, n'ûntû gûtirî mabîtia ndûthîîte.
Na ndaûkîîra ndakwona, ngaakena mûno.