Kîrîro îgiitani rîa thîîna na nkaatho n'ûntû bwa wonokio
Sabuuri ya Ndaundi. Kîrî mûtongoria wa wini. Rwinwe na mwinîre wa rwîmbo rûra rwîtagwa, “Nthwariga ya rûkîîrî.”
22
1 Ngai wakwa, Ngai wakwa, i kî n'ûntû wantiganîria?I mbi n'ûntû ngûkûrîrîra ûnteethia, na ûkarega kûûya?
I mbi n'ûntû ûkûûrîria matû ngîkûromba ûteethio?
2 Ngai wakwa, ndîgûkayîra kûrî mûthenya, îndî naawe ûtikûmbîtîga.
Ndagûkayîra kûrî ûtugû, wana ntikwona kînogoko.
3 Amwe na ûgu, woû ûrî Ûra Mûtheru.
Woû ûtwîre ûkarîrîîte gîtî kîa ûnene, woû ûra Isiraeri bakumagia.
4 Biûyûûyû bietû i biagwîtîgîîtie,
na wabionokia.
5 Baakûrîrîîre na boonokua,
ibaagwîtîgagia na ûtaabeekîrithia nthoni.
6 Antû baugaga ntirî muntû, ndwa ûtheri ta kîginyo,
meneereetue na nkabûthua n'antû.
7 Bonthe baambonaga bakaanyûrûnta,
bakaangiitithia irumi na bakainainia biongo, bakauga,
8 “Na n'ûntû eegwetie Mwathani,
Mwathani ûyu îîndî ta namûteethie,
n'amûtuunyûkie twone,
n'ûntû ingî n'we akenagîîra.”
9 I woû wamenyeere ngîciarwa kuuma nda ya maama,
wamenyeera wa ngîonkaga nyonto cia maama.
10 I woû ntûûraga ndîgwetie kuuma gûciarwa,
na rîonthe ûtûûraga ûrî Ngai wakwa.
11 Îgua ûrî akubî naani,
n'ûntû thîîna îtirî aaraaya
na gûtirî ûngî wa gûnteethia.
12 Anthû banthiûrûkîrîîte ta ncamba cia ng'ombe i ng'entu,
ncamba cia ndûa cia Mbasani incerereete nteere cionthe.
13 Bambatîkîrîîtie tûnyua twao,
ta cimba îkûruruma îgîteembûranga nyamû.
14 Inya yakwa îkûthira,
yakara ta rûûyî rwatûûrwa nthîgûrû.
Maîndî maakwa makûregana,
nkoro yakwa yakara ta mayeco makanjûkîîte i mwanki.
15 Inya yakwa n'înyaarîîte ta îng'aaria,
na rûrîme rwakwa rwarûmanîîra na kathakatha,
wamaamia tîîriini ya ara bara bakuû bakaraga.
16 Kîrîndî kîa bara bathûûku i gînkîmbîîte,
baancerereete bakari ta kurû,
baatembûranga njara na magûrû ta cimba.
17 Maîndî maakwa monthe i bûûrîîni marî,
anthû baakwa nwaka bankûnîrîîte meetho bakîîmbîkumagîria.
18 Baacooka baaringîra nguo ciakwa kuura,
muntû aathûkia îra aagwîyagîrwa n'yo.
19 Woû Mwathani, ûtikeegue ûrî aaraaya naani!
Ncû na mpwî, ûnteethie!
20 Ûtikaareke anthû baakwa baambûraga na mpiû ciao,
tuunyûkia mwoyo wakwa kuuma inyaani ya kurû ino.
21 Ntuunyûkia kuuma magegooni ma cimba,
n'ûntunyûkîîtie kuuma ngociini cia mbogo.
22 Ngakûmenyithania kîrî aruayia na aarayia,
Nkainaga ndwîmbo cia gûgûkumia biîthîranooni. Ngaatûmîîria riîtwa rîaku kîrî antû ba gwetû, na ngûkumîrie kîûthûranooni ara antû baaku bakûgongagîra.
23 Biû bara bûgongaga Mwathani, mûkumieni!
Bwinthe biû ba rûrîîyo rwa Njakubu! Mûtîîyeeni.
Mûgongeni, biû antû ba Isiraeri.
24 N'ûntû ataabûthia kana akirîra
kûnyamaara kwa bara bakûnyamaarua,
na ataabaûndûkîria mûgongo abatiganîria,
rîonthe n'abathikagîîria bamûkayîra abateethia.
25 Mbere ya gîkomano kîonthe ngagûcookeria nkaatho n'ûntû bwa bûra ûrûthîîte,
ngakûrutîra igongwana bira ndakwîrire, bara bakûgongaga bakîonaga.
26 Nkîa i kaarîa na ibae.
Bonthe bara baceragia Mwathani bakamûkumia.
Ngai aroobûnenkera gîkeno tene na tene.
27 Mîgongo ya nthîgûrû yonthe îkaaririkana Mwathani,
kuuma nteere cionthe cia nthîgûrû îkamûcookera.
Antû ba mîgongo yonthe
bakamûgonga.
28 Ûnene bunthe i bwa Mwathani,
na n'we aathaga mîgongo.
29 Itonga bia nthîgûrû bionthe bikaarîa na bimûturîrie maru,
bonthe bara bakuuyaga bagaaturia maru mbere yake.
Na ûra ataûmba gwîtûûria mwoyo.
30 Nciarwa ikaaya ikamûtûmîkîra,
ikaaria mantû ma Mwathani kîrî nciarwa ira ikaaya Nyumaani.
31 Na bara batarî baciare,
bagatûmîîrua beerwe,
“Mwathani n'we oonokiirie antû baake.”