Mantû maathûûku mara marûthagwa n'antû
(Sabu 53)
Kîrî mûtongoria wa wini. Sabuuri ya Ndaundi.
14
1 Kîaa kîîbîîraga nkorooni,“Gûtirî Ngai.”
Bonthe n'antû baathûûku,
na barûthaga mantû maathûûku, gûtirî kinya nwa ûmwe arûthaga bwega.
2 Mwathani araithagîîria arî îgûrû
kîrî aana ba antû
oona kana gatîgatîîni kaao kûrî we ûmûûgî,
ûra aceragia Ngai.
3 Bonthe i bagwîte,
bonthe bathûûkîîte bûmwe,
gûtirî nwa ûmwe arûthaga bwega,
gûtirî nwa ûmwe.
4 Mwathani arîûria î, “I ka babu barûthaga ûthûûku bataciûkagîrwa?
Bara barîîyaga antû baakwa ta antû bakûrîa nkima,
na batirombaga Ngai.”
5 Îndî bakagwatwa n'ûguaya bûûnene mûno,
n'ûntû Ngai arî amwe na antû baake bara baagîru.
6 Bara bathûûku beenyangagia mîbango ya nkîa,
îndî Ngai n'we wîbitho bwa cio.
7 Ûtakîîgua wonokio bwa Isiraeri bwauma Sayuuni!
Rîra Mwathani agaacookeria antû baake mawega maao,
Njakubu agaakena, na Isiraeri agwîrue.