Îromba n'ûntû bwa gûcwa ûteethio
Kîrî mûtongoria wa wini. Sabuuri ya Ndaundi ya kwinwa na ngita ya ndigi inyanya.
12
1 Tûteethie Mwathani n'ûntû gûtirî muntû mwîtîgua ûtigeere,n'ûntû eetîgua ibaûrîîte gatîgatîîni ga antû.
2 Woora muntû arîrongoyia ûra ûngî,
mîromo yao îrî rwaria rwao rûrî mûrîo, îîndî n'ûrongo bûtherî.
3 Mwathani aroogiita mîromo yonthe ira yaaragia ûrongo
na rûrîme runthe rûra rwîkumagia.
4 Bara baugaga, “Tûkaûmbana na rûrîme rûrû rwetû
mîromo îno yetû,a n'ûû ûûmba gûtûkiria?”
5 “N'ûntû bwa kwinyîîrua kwa bara batarî na inya
na gûkaya kwa bara barî na ûbatu,
Îîndî ngaûkîîra,” I bu Mwathani akuuga,
“Na nkabaa ûkaria bûra batûûraga beeriragîria.”
6 Mawîrane ma Mwathani i mawîrane maatheru,
nwa ta *fetha îkembeetwe na mwanki
îthereetue maita mûgwanja.
7 Yîî Mwathani ûtûrigîîrie,
tûkarie kuumania na nthuke îno tene na tene.
8 Bara bathûûku batûthiûrûkîrîîte mbarî cionthe,
mantû mara mathûûku i mo bakumagia gatîgatî ga antû.