Îromba rîa kûgiitîra bara bathûûku îgamba bûra kûbatîîrue
10
1 Mwathani, i mbi n'ûntû ûrî aaraaya?I mbi n'ûntû wîbithaga kagiita thîîna?
2 Wîkumiani bwake muntû ûra mûthûûku ebûkîîrîîtie nainya kwinyîîria nkîa.
Barekeerie barîîkîrue barî bo n'ûthûûku bûra babangîîte.
3 N'ûntû ûra mûthûûku eekumagîria mawîrirîîria ma nkoro yake,
na ûra ûtanûkagîra ûtonga, arumaga na akarega Mwathani.
4 N'ûntû bwa wîkumia bwake, muntû ûra mûthûûku aticeragia kûmenya Ngai.
Mathûgaaniani maake augaga gûtirî Ngai.
5 Mantû maake makaraga bwega magiita monthe,
i mwîkumia na mawatho maaku marî kûraaya nwe,
na n'anyûrûûntaga anthû baake bonthe.
6 Eebîîraga nkorooni yake, “Ntikooroenyenyua i gîntû,
rîonthe nkeegagua nkeneete na ntiona thîîna rî kana rî.”
7 Kanyua gaake kaûyûri kûrîrîkana, kûrongoa na ntheto cia rûmena.
Barî mpwî cia kwaria biugo biithûûku na bia rûmena.
8 Akaraga eebithîîte agiitîrîîte naagu ntûûrani,
eeteereete aûraga antû batarî na mabîtia.
Meetho maake makaraga maraithîrîîte antû bara batarî na wa kûbateethia.
9 Eetagîîra eebithîîte bantû agiitîrîîte ta cimba,
akamaamîîra eeteereete nkîa amîgwata.
Akabagwata na akabakururia na neeti.
10 Bara batarî na inya baithûkagîrwa bagakindwa nthi,
bakagwa nûntû bwa inya ya muntû ûyu mûthûûku.
11 Mathûgaaniani maake augaga, “Ngai n'ariganîrîtue,
n'aithîîte ûthiû bwake na gûtirî kîo akwona.”
12 Itû Ngai, ûkîîria njara yaku Mwathani,
î na wakûbatethia.
13 N'ata antû baathûûku bakûruma Ngai?
Na bakeebûûragia bongwa,
“Atinkaanûkia?”
14 Îndî Woû, Ngai, n'wonaga bûra antû bathîînaga na bakanyamaara
na n'ûbangîîte gûteethia.
Nkîa nwaciîgwatie woû,
i woû wîrîgîîro bwa bara nkîa na ntigwa.
15 Thiria antû bara bathûûku na eeyia,
ûthirie ûthûûku bwao bunthe bûtikoonekane kaîrî.
16 Mwathani n'we mûnene tene na tene,
mîgongo îkaathira yuume nthîgûrû yake.
17 Itû Mwathani, kiinda gûtû ûthikîîrie maromba ma bara bainyîîrie,
ûkabeekîra wîru, na ûthikîîrie gûkaya kwao.
18 Ûrûîrîîre nkîa na kinya bara bainyîîrie,
kaingo muntû nwa ûrîkû wa nthîgûrû, atacooka kûbamakia kaîrî.