Gûcookeria Ngai nkaatho n'ûntû bwa wagîru bwake
Kîrî mûtongoria wa wini. Rwinwe na mwinîre wa rwîmbo rûra rwîtagwa, “Gîkuû kîa mwana.” Sabuuri ya Ndaundi.
9
1 Ngagûcookeria nkaatho Mwathani, na nkoro yakwa yonthe.Nkeeyana mantû ma ngûgî ciaku cionthe bûra irî cia kûrigaria.
2 Nkaagwîrua na nkene n'ûntû bwaku.
Ngîkumagia riîtwa rîaku na rwîmbo, Woû Ûra Arî Îgûrû Mûno.
3 Anthû baakwa bagûcooka nyuma,
bataratarire na baathirîra mbere yaku.
4 N'ûntû n'ûntheteereete mantûûni maakwa ma mma,
ûkarîrîîte gîtî kîa ûnene ûkîgambithanagia bûra kûbatîîrue.
5 Woû n'ûgondokereete mîgongo, na wathiria bara bathûûku,
wabuuta riîtwa rîao tene na tene.
6 Anthû beetû i bathirîîtue mwanka tene na tene,
n'womboranîîtie taûni ciao,
na ciariganîria cwe.
7 Îndî Mwathani agaatûûra akîathanaga tene na tene.
N'athuuranîrîîte gîtî gîake kîa ûnene agambithania.
8 Akagambîra nthîgûrû arî na wagîru,
akaathaga mîgongo bûra kûbatîîrue.
9 Mwathani n'we wîbitho bwa bara bainyîîrie,
wîbitho magiitaani ma thîîna.
10 Bara bakwiyî, i woû bakeerîgagîîra,
n'ûntû woû ûtitiganagîria bara baayaga kîrî woû.
11 Inaani bûgîkumagia Mwathani, ûra atûûraga Sayuuni!
Îraani antû ba mîgongo yonthe bûra arûthîîte!
12 Ngai n'arîagia bara betûûraga nthakame;
Atiregaga kûthikîîria kîrîro kîa bara bainyîîrie.
13 Woû Mwathani! Raitha wone bûra anthû baakwa baanyamaarîîtie bûgana!
Mbîgîîrua kîao, ûntuunyûkagia kuuma gîkuûni,
14 kaingo menyithania ûkumio bwaku
mîîrîgaani ya mwarî wa Njerusaremu,
na ngakeneera wonokio bwaku.
15 Antû ba mîgongo i beenjire îrinya na boorokera ku,
magûrû maao maagwatwa i neeti ira baambire.
16 Mwathani n'eebonanîîtie wengwa na kûgambithania bûra kûbatîîrue,
na athûûkia barîîkîrua i ngûgî îra baarutire na njara ciao bongwa.
17 Bara bathûûku bakarîkîîria gîkuûni.
Mîgongo yonthe îra îriganagîrua i Ngai.
18 N'ûntû bara barî na ûbatu gûtirî rîo bakaariganîria,
kana wîrîgîîro bwa nkîa bûthira rî kana rî.
19 Ncû Mwathani! Ûtikaareke muntû aaya gûcinda;
Ka antû ba mîgongo i bagambîrwe mbere yaku.
20 Beekîre ûguaya, Mwathani,
reka antû ba mîgongo bamenye bo nwa antû tu.