Îromba n'ûntû bwa wagîru
Rwîmbo rwa Ndaundi, rûra ainîîre Mwathani îgûrû rîa Kusi, Mûbenjameni.
7
1 Mwathani Ngai wakwa, i woû wîbith bwakwa,mbonokia na ûntuunyûkie kuumania na bonthe bara benganîîte naani.
2 Batikaaye gûnteembûranga ta bûra cimba îrûthaga,
baankururie bathi naani, gûtarî we wa gûntuunyûkia.
3 Woû Mwathani Ngai wakwa, wegua i ndûthîîte ûûgû,
wegua kûrî na mabîtia njaraani ciakwa,
4 wegua kûrî muntû ndaarorûthîra ûthûûku
kana ntuunyana kîrî mûnthû wakwa gûtarî na gîtûmi,
5 rekeeria anthû bakwa banthingate na bangwate,
barekeerie bantemange na bambûrage
na boone bagûntiga nthî ndî ntungu!
6 Ncû Mwathani na mûthûûro waku,
ûkîîra ûndigîîrie kuumania na marûrû ma anthû baakwa.
Ncû woû Ngai wakwa ûgiite îgamba.
7 Tiga mîgongo yîîthîrane kîrî woû,
nawe ûmîathe kuuma îgûrû.
8 Ka Mwathani agambithie mîgongo.
Ngambithia Mwathani kûringana na wagîru bwakwa,
Kûringana na wega bwakwa itû Mwathani wa îgûrû.
9 Ûrî Ngai ûra mwagîru
ûra acûnkûûnaga nkoro na mathûgaania ma antû.
Thiria ûthûûku bwa bara bathûûku
na ûtûme bara baagîru bakara mayîîga.
10 Ngai ûra arî îgûrû mûno, n'we rong'o yakwa,
we ûra wonokagia bara baagîru nkoro.
11 Ngai agambithanagia na ûmma,
na i Ngai ûra onanagia mûthûûro wake kîrî ûthûûku wa îra ntugû.
12 Wegua muntû atiîrira,
Ngai akaanoora rûûyiû rwake,
na atume ûta bwake na n'abukuuyie,
13 n'athuuranîrîîte into biake bira biega bia ndûa,
na aathuuranîra mîguî yake îgwankana ta mwanki.
14 Ene, antû bathûûku babindaga njûri cia ûthûûku.
Baûyûrîîtwe i wînyangia,
na maciaro maao i kwenanîîria.
15 Ûra enjaga îrinya na akariukûra,
nwe wengwa acookaga kûgwa ku.
16 Ûthûûku bwake bûkamûcookera we wengwa,
wînyangia bwake bûkamûgwîra kîongo gîake.
17 Ngaacookeria Mwathani nkaatho n'ûntû bwa wagîru bwake,
na nkaina ngîkumagia riîtwa rîa Mwathani Ûra Arî Îgûrû Mûno.