Îromba n'ûntû bwa gûcwa ûteethio îgiita rîa thîîna
Kîrî mûtongoria wa wini. Rwinwe na ngita ya ndigi inyanya. Sabuuri ya Ndaundi.
6
1 Itû Mwathani, ûtikaangondokere na mûthûûro,kana ûmpa îkaanûkia ûrî na marûrû.
2 Mbîgîîrua kîao itû Mwathani, n'ûntû ntirî na inya.
Itû Mwathani, mboria, n'ûntû maîndî makwa marî na ûrûrû mûno.
3 Nkoro yakwa n'yo n'îkûnyamaara mûno,
i mwanka rî, Mwathani, i mwanka rî?
4 Garûka, Mwathani, ûntuunyûkie,
mbonokia n'ûntû bwa wendo bwaku bûra bûtathiraga.
5 Gûtirî we akûririkanaga arî mûkuû,
n'ûû ûûmba gûgûkumia arî nthikooni?
6 Inogeete i kûrîra,
wa kîra ûtugû mbûyûragia gîtanda gîakwa kîrîro,
na nkarindaria kîmaamîro gîakwa na meethori.
7 Meetho maakwa i makûthira inya n'ûntû bwa kîeba,
marîthira inya n'ûntû anthû baakwa.
8 Umaani aaga ndî, bwinthe bara bûrûthaga mantû mathûûku,
n'ûntû Mwathani n'eegîîtue kayû ga kîrîro gîakwa.
9 Mwathani n'eegîîtue nkîrîra ambîgîîrua kîao,
Mwathani n'etîgîîrîîtie îromba rîakwa.
10 Anthû baakwa bonthe bakaagîa îgi na batangîke mûno,
nthûti îmwe bakaûndûka bathi napwî nûntû bwa îgi.