Îromba n'ûntû bwa kûrigîîrua
Kîrî mûtongoria wa wini. Rwinwe na mbeebe. Sabuuri ya Ndaundi.
5
1 Nthikîîria Mwathani,raithîîria mathûgaania maakwa.
2 Îgua kîrîro gîakwa ngîgûkayîra ûntethia,
Mûnene na Ngai wakwa,
n'ûntû nwa woû nkûromba.
3 Itû Mwathani, rûkîîrî n'wîgagua kayû gaakwa,
rûkîîrî i nkûrombaga
na ngeteera mbîrîgîîrîîte ûncookeria.
4 N'ûntû woû ûtirî Ngai ûra akenagua n'ûthûûku,
ûtiîtîgîîria ûthûûku nwa bûrîkû ara ûrî.
5 Eekumia batiûmba kûrûngama mbere yaku,
woû n'ûmeneete bonthe bara barûthaga wîyia.
6 N'ûthiragia bara baaragia ûrongo,
Mwathani nathwîre bara beendeete kûûragana, na kwenanîîria.
7 Îndî niû, n'ûntû bwa wendo bûûnene,
nkaathûngîra Nyomba yaku,
nkûgonge na gîtîîyo, mbînîke kîongo
ndaithîîte Nyomba yaku îra ntheru.
8 Mwathani, ntongoreeria ûtheruuni bwaku,
na n'ûntû bwa anthû baakwa baingî,
tuîkithia njîra yaku îmbaranîru mbere yakwa.
9 Gûtirî kiugo nwa kîmwe gîa kanyua kao kîûmba gwîtîgîka;
nkoro ciao ciûyûrîîte wînyangia.
Mimero yao îkari ta nthiko îrî mbukûre;
batûmagîra ndîme ciao kwaria ûrongo.
10 Woû Ngai, batwîre atî barî na mabîtia,
barekeerie bagwe mîtegooni yao bongwa.
Beengatie n'ûntû wîyia bwao i bwingî,
n'ûntû i bakûremeete.
11 Îndî ka bara bonthe beebithaga kîrî woû bakene,
ka baine nyîmbo cia gîkeno.
Ûmenyeere bara bakwendeete,
Kaingo bara bakwendeete bakena riîtwani rîaku.
12 N'ûntû na mma, Woû Mwathani n'ûthaarimaga bara baagîru,
ûbairigîrîîte na kwendeerwa gwaku ta rong'o ya kûbarigîîria.