Njakubu aacooka Betheri
35
1 Rîru Ngai eera Njakubu, “Îthi Betheri naara ndaakuumîîre rîra waatoorokeete mûruanyûkwe Esaû ûtûûre noogo, na ûmbakîre kîthînjîro.”2 Rîru Njakubu eera antû ba mûciî wake na bonthe bara aarî nabo, “Îtaani ngai i ngeni ira bûrî nacio, na bwîtherie na bûcencie nguo cienu. 3 Rîru bûûye twîtie Betheri, naara ngaakîra Ngai kîthînjîro, ûra aancookeerie îromba ntugû îra ndaarî na thîîna na ûra eethagîrwa arî amwe naani bantû ara onthe nthiyaga.” 4 Kwoogu baapa Njakubu ngai i ngeni cionthe ira baarî nacio na mina ira ciarî matû, na Njakubu acithika ruungu rwa mûtî ûra wetagwa mûpuru naara Sekemu. 5 Rîra Njakubu na antû ba mûciî gwake baanjîîrie kûthi, Mwathani aareetera antû ba taûni înu ciabathiûrûkîîrîîte kîmako kîînene mûno, kwoogu gûtirî we eengana nabo.
6 Njakubu na antû bara aarî nabo bonthe baakinya Rusi t'yo Betheri ndeeni ya nthîgûrû ya Kanaani. 7 Aaka kîthînjîro oogo, na eeta bantû agu Eri Betheri,a n'ûntû noogo Ngai eebonaniirie kîr'we rîra aatoorookeete kuuma kîrî mûruagina.
8 Rîru Ndiboora, ûra aamenyagîîra Rebeka, aakua na aathikwa ruungu rwa mûpuru iti ya Betheri. Kwoogu gwetwa mûpuru wa kîrîro.
9 Rîra Njakubu aacookire kuuma Pandani-Aramu, Ngai amuumîîra kaîrî na amûthaarima. 10 Ngai amwîra, “Wîtagwa Njakubu, îndî ûtiîtwa Njakubu kaîrî; riîtwa rîaku n'Isiraeri.” Kwoogu amwîta Isiraeri.
11 Na Ngai amwîra, “Ndî Ngai Mwene Inya, thagaya na wongeereke. Mûgongo ûmûnene ûkauma kîrî woû, na anene bakauma nciarwani ciaku. 12 Nthîgûrû îra ndeere Îburaîmu na Isaka kinya woû ngûkûa na nkaanenkera nciarwa ciaku ira ikaaya nyuma yaku.” 13 Rîru Ngai eetia kuuma kîrî we ara aarîrîîtie n'we.
14 Njakubu aarûngîka gîtugî kîa maiga bantû ara Ngai aarî akwarîria n'we, na aatûûrîria gîtugî kîewa kîa biakûnyua; agîtûûrîria kinya maguta. 15 Njakubu n'aarî agwîta bantû agu aarîrîîtie na Ngai Betheri.
Gûkua kwa Raeri
16 Rîru bauma Betheri baathi bwa n'aiti beerekereete Eburathi. Wa barî gataaria Raeri anjîîria kûgîa na mwana na eegua arî na thîîna mûno. 17 Na arî na thîîna akîgîa na mwana woogu, mwekûrû ûra aamûteethagîîria amwîra, “Ûtikaamake, n'ûntû ûkûgîa na kaîyî kaangî.” 18 Raeri aarî akubî gûkua, îndî mbere akua ageeta Mbeni-Onib îndî Njakubu ageeta Benjameni.c
19 Kwoogu Raeri aakua, na aathikwa njîraani ya kûthi bwa Eburathi t'yo, Bethireemu. 20 Na Njakubu aarûngîka gîtugî îgûrû rîa îrinya rîake; i kîo gîtugî kîa nthiko ya Raeri, kîra kîrî oogo mwanka îmunthî. 21 Isiraeri aathi na mbere na rûgendo na aamba îrema rîake rûteere rûra rûngî rwa kîbayo kîa Migindari-Enderi. 22 Njakubu wa atwîre nthîgûrû înu, Rubeni aathi amaama na Mbiria mûka wa îthe wa kwaiga; na Njakubu eegua ntheto inu.
Aana ba Njakubu
(1Karaaya 2:1-2)
Njakubu aarî na nthaka îkûmi na ciîrî.
23 Nthaka cia Rea ciarî:
Rubeni gîtûra îria kîa Njakubu, Simioni, Rawi, Njunda, Isakaari, na Seburuni.
24 Nthaka cia Raeri ciarî:
Njosebu na Benjameni.
25 Nthaka cia Mbiria, mûruti ngûgî wa Raeri ciarî:
Ndani na Nabutarî.
26 Nthaka cia Ciripa, mûruti ngûgî wa Rea ciarî:
Ngandi na Aseri. Ino i cio ciarî nthaka cia Njakubu ira aaciarîrîîtwe arî Pandani-Aramu.