Ndina na Asekemu
34
1 Îîndî Ndina, mwarî wa Rea, ûra aaciarîrîîte Njakubu, aumagarûka aathi kûriûngîra aarî ba nthî înu. 2 Rîra Sekemu mwana wa Amori wa Aibi, mûnene wa nthîgûrû înu aamwonire, amûthûkia amûgwata kîa inya. 3 Na nkoro yake yenda Ndina mwarî wa Njakubu; eenda mwarî ûyu na aacûûgia kûmwarîria na wendo kaingo n'we amwenda. 4 Na Sekemu eera îthe Amori, “Nthûkîria mwarî ûyû atuîke mwekûrû wakwa.”5 Rîra Njakubu eegiirue mwarî wake Ndina neenyangiirue, nthaka ciake nacio i ciarî rûriîni na mbûri, aakirîra ntheto inu mwanka rîra ciayire mûciî. 6 Na Amori îthe wa Sekemu aumagarûka aathi kwaria na Njakubu. 7 Rîru nthaka cia Njakubu i rîo ciarî i gûkinya ciumîîte rûriîni bakîîgua bûra kwarî gûkarîka. Rîra ciamenyire Sekemu naarî akûgwata mwaragina kîa inya, nkoro ciao ciaûyûrwa i mûthûûro mûno n'ûntû bwake. Sekemu kûrûtha Ndina ûgu, aarûthîîte mabîtia maanene ndeeni ya Isiraeri. Mantû maathûûku ta mamu matibatîîrue kûrûthwa.
8 Amori eera Njakubu na nthaka ciake, “Nthaka yakwa Sekemu n'yendeete Ndina mûno. Itû îtîgîîriani amûgûre. 9 Tûgûranîreeni; tûpeeni aarî beenu naabi bûthûkie aarî beetû. 10 Nwa bûtûûranîre naati, nthî îno bûtikûrigîîrua bûrî beetîgîîrie. Tûûraani ku bûriinge biacaara bûgîe na ûtonga.” 11 Sekemu kinya we eera îthe wa Ndina na aruagina, “Tiga mbone kwendeerwa meethooni meenu, na kîra kîonthe bûkaambîtia nkabwaa. 12 Ntuîraani rûraayio rwa mwarî na kîewa kîînene wa kîra bûkeenda, na nkaarîa wa kîra kîonthe bûkaambîtia. Bunka bûmpe mwarî atuîke mwekûrû wakwa.”
13 Nthaka cia Njakubu ciacegeera Sekemu na îthe Amori, n'ûntû bwa bûra Sekemu aarî akûrûtha mwaragina. 14 Babeera, “Tûtiûmba kûrûtha ûntû ta bûbu; tûtiûmba kweyana mwarayia kîrî muntû atarî mûtaane. Rîru wîgua rîrî îgi kîrî tiû. 15 Tiû tûgagwîtîgîîria ûmûgûre îndî tûgwatanîre ûntû bûmwe akî. Nabu i bûbû, bûgaakara ta tiû na njîra ya gûtaana antû arûme beenu bonthe. 16 Rîru tûkabwaa aarî beetû na tiû tûthûkie aarî beenu. Tûgaatûûranîra naabi na tûtuîke antû bamwe naabi. 17 Îndî bwarega gwîtîgîîria gûtaanwa, tûkaathûkia mwarî wetû na tûthi.”
18 Mîgambo yao yaakenia Amori na mwan'wake Sekemu. 19 Na mwana ûyu, ûra apeetwe gîtîîyo mûno kwa îthe, ataata kaanya aarûtha woogu baugire, n'ûntû n'endeete mwarî wa Njakubu. 20 Kwoogu Amori na mwana wake Sekemu baathi mwîrîgaani wa ntûûra yao kwîra akûrû ba ntûûra. 21 Babeera, “Antû baba n'acoore; barekeeni batûûre nthî îno na barûthîre biacaara ku, n'ûntû raitha, nthî n'înene ya kûbagana; ga tûgûre aarî baao, nabo bagûre aarî beetû. 22 Îndî antû babu bageetîgîîria gûtûûranîra naati tûrî gîntû kîmwe wegua antû arûme beetû bagaataanagwa, ta bûra bo bakari. 23 Nyamû ciao cia ndîîthia, ûtonga bwao na nyamû ira ingî ciao cionthe rî, itiituîka cietû? Kwoogu ga tûbeetîgîîrie tûtûûranîre nabo.”
24 Kwoogu antû arûme bonthe beetîganîîria na Amori na mwana wake Sekemu, na muntû mûrûme wonthe ntûûrani înu aataanwa.
25 Ntugûûni ya ithatû, wa barî na ûrûrû, nthaka ciîrî cia Njakubu, Simioni na Rawi, aruagina ba Ndina, baathûkia mpiû baithûkîra ntûûra batakûmenywa, baûraga antû arûme bonthe. 26 Baûraga Amori na nthaka yake Sekemu na rûûyiû, na baathûkia Ndina kuuma nyomba ya Sekemu, baathi n'we. 27 Na nthaka inu ingî cia Njakubu ciathi kîrî antû babu baûragîîtwe baataa ntûûra înu yao, n'ûntû bwa bûra mwaragina aathûûkîîtue; 28 baataa ndîîthia ciao cia mbûri, ng'ondu na ng'ombe, mang'ooi, na kîonthe kîra kîarî ntûûraani na mîndaani; 29 ûtonga bwao bunthe, baagwata eekûrû na aana baao bonthe barî nkombo, baataa bionthe bira biarî nyomba.