Njakubu aakomana na Esaû
33
1 Njakubu aaraitha oona Esaû aayîîte na antû baake magana mana, kwoogu abaanga aana baake bathi na bagina Rea, Raeri na aruti ngûgî baake ba aarî barî baîrî. 2 Aabanga aruti ngûgî babu ba aarî na aana baao mbere, Rea na aana baake baathingatîîra, Raeri na Njosebu baarigia. 3 Wee wengwa aathi mbere yao akîîndamagîîra nthî maita mûgwanja mwanka aakinya akubî na mûruagina.4 Îndî Esaû augia kûmûthagaana, amûkuumbata, amûrigicîria njara nkingooni yake amûcunca, baarîranîra. 5 Na rîra Esaû aûkîîrie meetho oona eekûrû na twana, aûria, “I baaû baba ûrî nabo?” Njakubu amwîra, “N'aana bara Ngai ambîgîîrîîtue kîao ampa bo.” 6 Rîru aruti ngûgî baake ba aarî baakinya, bo na aana baao, na beendamîîra. 7 Rea kinya we na aana baake baakinya na beendamîîra; na mûthiani Njosebu na Raeri baakinya, na beendamîîra.
8 Esaû aûria, “N'ata ûkûbanga na ikundi bia nyamû cia ndîîthia bira nkomanire nabio?” Njakubu aacookia, “Imbona kwendeerwa meethooni maaku mwathi wakwa.” 9 Îndî Esaû amwîra, “Ndî na cia kûgana mûruayia, gaiga biaku.” 10 Njakubu amwîra, “Arî, itû ngûkwereka, wegua i mboneete kwendeerwa mbere yaku, îtîgîîria kîewa kîra kiumîîte njaraani ciakwa. N'ûntû ûmma kwona ûthiû bwaku itakwona ûthiû bwa Ngai, ta îîndî wambaambîîria na wendo. 11 Itû ngûkwereka, îtîgîîria, kîewa gîakwa kîra kîreeteetwe kîrî woû, n'ûntû Ngai n'eethîrîtwe arî ûmwega kîrî niû, na n'ûntû ndî na bia kûgana.” Aathi na mbere kûmûkaîrîîria, na nyumaani Esaû eetîgîîria. 12 Rîru Esaû auga, “Ga tûthi, na nkaathi ndî mbere yaku.” 13 Îndî Njakubu amwîra, “Mwathi wakwa n'ûkwona twana tûmwe i tûûniini, na nyamû cia ndîîthia mbûri na ng'ondu na ng'ombe n'igwonkia. Irî na tûbûri, tûgondu na tûyaû tûûniini na nwa mwanka imenyeerwe; na ikaaya kuugithua ntugû îmwe, ndîîthia cionthe nigaakua. 14 Kwoogu ka mwathi wakwa athi arî mbere ya mûruti ngûgî wake, naani mbûye mpoora kûringana na mûthiîre wa ng'ombe ira irî mbere yakwa na mûthiîre wa aana, mwanka nkinye kwa mwathi wakwa Seiri.” 15 Kwoogu Esaû auga, “Ga ngûtigîre antû bamwe bara ndî nabo.” Îndî Njakubu aûria, “Kûrî na gîtûmi kîbi? Ka mbone kwendeerwa meethooni ma mwathi wakwa.” 16 Kwoogu ntugû wa înu Esaû aambîîria rûgendo rwa gûcooka Seiri. 17 Îndî Njakubu aathi bwa Sukothi, na eebakîra kaganda, na airigîra ndîîthia ciake. I kîo gîtûmi bantû agu eetagwa Sukothi.
18 Nyumaani baakinya Sekemu îra îrî Kanaani batarî na thîîna, baumîîte Pandani-Aramu na baamba marema maao waagu ome ya ntûûra. 19 Aagûrîîre nthaka cia Aamori, îthe wa Sekemu, kîthaka ara aambire îrema rîake. Aakîgûrire na icuncî îgana rîmwe bia thaabu. 20 Aarûtha kîthînjîro oogo na agîîta Eri Eroe Isiraeri.a