Njakubu eethuuranîra gûkomana na Esaû
32
1 Njakubu arî njîraani acookeete kwao, aakomana na araîka. 2 Njakubu akûboona, auga, “Îno i njûûrî ya Ngai!” Kwoogu eeta bantû agu Maanaimu.a3 Njakubu n'aatûmire atûmwa mbere baathiyaga kîrî mûruagina Esaû ndeeni ya nthî ya Seiri, nthîgûrû ya Endomu. 4 Abaatha abeera, “Ûûgû i bu bûkeera mûnene wakwa Esaû, ‘Mûruti ngûgî waku Njakubu ariuga, eethîrîîtwe agîkara na Rabani mwanka îîndî. 5 Arî na ng'ombe na mang'ooi, ng'ondu na mbûri, aruti ngûgî ba antû arûme na aka. Îîndî arîtûmana ntûmwa îno kîrî mwathi wake, oone kwendeerwa meethooni maaku.’ ”
6 Rîra atûmwa baacookire kîrî Njakubu, baugire, “I tûrathiire kîrî mûruanyûkwe Esaû, na îîndî n'ayîîte gûkûthagaana, na arî na antû magana mana.”
7 Njakubu aamaka mûno na aaguaya. Aagaania antû bara aarî nabo, mbûri, ng'ondu, ng'ombe na nkamîîra, magucî maîrî. 8 Aathûgaanagia, “Esaû aaya kîrî gîkundi kîmwe akîînyangia, kîra kîngî gîkaûmba kûmonyia.”
9 Na Njakubu aaromba auga, “Îî Ngai wa baaba Îburaîmu na baaba Isaka, îî Mwathani ûra ambîîrire, ‘Cooka nthî yenu na kîrî antû beenu, na ngakûthagayia,’ 10 ntiagîrîte wa kwonua wendo bûra bûtathiraga bunthe na wîtîgîka kûra ûmboneetie niû mûruti ngûgî waku. Îgiita rîa mbere nkîringa muuro ûyû wa Njorondani, ndaarî na mûraagi akî, îndî îîndî ndî na ikundi biîrî bia antû na nyamû cia ndîîthia. 11 Ndakûromba ûntuunyûkie kuuma njaraani cia mûruayia Esaû, n'ûntû ingûkuthûka aaya kûmbûraga, na aana na kinya bagina. 12 Îndî n'ugîîte, ‘Ûmma ngaatûma ûthi na mbere na nkaathagayia nciarwa ciaku ta mûthanga wa îria, ûra ûtatarîka.’ ”
13 Aaraara agu, na kuuma kîrî bira aarî nabio aathuura kîewa kîa mûruagina Esaû. 14 Mîgoma magana maîrî ya mbûri na nthenge mîrongo îîrî, mîgoma ya ng'ondu magana maîrî na ntûrûme mîrongo îîrî. 15 Mîgoma ya nkamîîra mîrongo îthatû na tûyaû twacio, ng'ombe mîrongo îna na ncamba îkûmi, na mang'ooi ma mîgoma mîrongo îîrî na ma ncamba îkûmi. 16 Acinenkanîra kîrî aruti ngûgî baake, wa kîra gîkundi gîtongorereetue mwanya, na eera aruti ngûgî baake, “Îthiini bûrî mbere yakwa, na bwaige mwanya gatîgatî ka wa kîra gîkundi.” 17 Eera kîra kîarî mbere buru, “Rîra Esaû mûruayia akaabûthagaana na abûûrie, ‘Bûrî baaû, na i kû bûthiîte, na nyamû ino bûthingatîrîîtie i ciaû?’ 18 Rîru bûmwîre, ‘I cia mûruti ngûgî waku Njakubu; irî kîewa kîra gîtûmîrîîtwe mûnene wake Esaû, na nkûrûki ya ûgu arî nyuma yetû.’ ” 19 Eera wa baîrî na wa bathatû na bara bonthe baathingatîrîîtie mîkondo înu beere Esaû woogu baakomana n'we. 20 Na boone bakûmwîra mûruti ngûgî wake Njakubu n'ayîîte arî nyuma yao. N'ûntû aathûgaaniirie, kîewa gîku kîaûmba gûtûma batuma ûcoore kaîrî na Esaû na aakena rîra bagaakomana. 21 Kwoogu biewa bia Njakubu biathi birî mbere yake, îndî we aaraara ara aambîîte marema.
Njakubu aakiindana na Ngai
22 Ûtugû bûbu Njakubu aûka aathûkia eekûrû baake barî baîrî, aruti ngûgî baake ba aarî baîrî na nthaka îkûmi na ûmwe baaringa rûgongo rûra rûngî rwa muuro wa Njaboku. 23 Nyuma ya akûbaringia muuro, aaringia into biake bionthe. 24 Na Njakubu aatigwa wenka; na muntû aaya akiindana n'we mwanka rûkîîrî. 25 Rîra muntû ûyu oonire atikûûmba Njakubu, aatonga kaîndî ga nkunguro, na nkunguro ya Njakubu yaakûrûkana wa bûra aakindanaga n'we. 26 Rîru muntû ûyu amwîra, “Ndekia nthi, n'ûntû gûgûkea.”
Îndî Njakubu amûcookeria amwîra, “Ntikûrekia ûthi ûtaanthaarimîîte.”
27 Muntû ûyu amûûria, “N'ata wîtagwa?” Aacookia, “Njakubu.” 28 Muntû ûyu amwîra, “Ûtiîtwa Njakubu kaîrî, îîndî ûgeetagwa Isiraeri,b n'ûntû n'ûkindanîîte na Ngai na antû na waûmbana.”
29 Njakubu amwîra, “Îîndî mbîîra riîtwa rîaku.”
Îndî amûcookia amûûria, “I kî n'ûntû ûkwenda kûmenya riîtwa rîakwa?” Rîru athaarimîra Njakubu agu.
30 Kwoogu Njakubu eeta bantû agu Penieri,c auga, “Wana wegua ngûkomana na Ngai meetho kwa meetho, ndî mwoyo.”