Njakubu atoorooka auma kwa Rabani
31
1 Njakubu eegua aana ba Rabani i baugaga, “Njakubu narathûkiirie bionthe bira baaba araarî nabio; na ûtonga bûbû bunthe arabuonire kuumania na bira baaba araarî nabio.” 2 Njakubu aamenya Rabani atikûmûraitha na riitho rîega ta mbereeni. 3 Rîru Mwathani eera Njakubu, “Cooka nthîgûrû ya ba abaagu, na kîrî antû beenu, na nkaathiyania naawe.” 4 Kwoogu Njakubu eeta Raeri na Rea kîthakaani naara aarîîthîîtie, 5 abeera, “Inkwona abaagu atikûûndaitha bwega ta mbereeni. Îndî Ngai wa baaba neegîîtue arî amwe naani. 6 I bwiyî indutîrîte abaagu ngûgî na inya yakwa yonthe; 7 amwe na ûgu naambeneereetie aagarûra mûcaara wakwa maita îkûmi, îndî Ngai ataamwîtîgîîria anthûûkia. 8 Rîra augaga, ‘Ira irî marooro i cio ikeegagua irî mûcaara waku,’ nyamû inu cia ndîîthia cionthe ciaciaraga tûrî marooro; na aacooka auga, ‘Ira irî mîtabû ikeegagua irî mûcaara waku,’ nyamû inu cia ndîîthia cionthe igîciara tûrî mîtabû. 9 Kwoogu Ngai athûkîîtie nyamû cia abaagu cia ûrîîthi aanenkera cio.10 “Kagiitaani ga gûtwegwa kwa nyamû, ndaarootire nkîonaga nthenge ira ciatweyaga irî na marooro, mîtabû na macîgî. 11 Rîru Mûraîka wa Ngai ambîta kîrootooni, ‘Njakubu.’ Ndacookia, ‘Ndî aaga.’ 12 Ambîîra, ‘Ûkîîria meetho maaku wone, nthenge ira cionthe igûtwa mîgoma ya ndîîthia cia mbûri ciaku n'ira irî na marooro, mîtabû, na macîgî; n'ûntû i mboneete mara monthe Rabani agûkûrûthîra. 13 Ndî Ngai ûra aakuumîîre Betheri, ara waatûûrîîrie gîtugî kîa iiga maguta na waiga wîrane naani. Îîndî uma nthîgûrû îno nthûti îmwe na ûcooke nthîgûrû yenu.’ ”
14 Rîru Raeri na Rea bamûcookia, “I ka kûrî gacuncî kana ka rûgai rwetû rûtigîîtwe mûciî wa baaba? 15 Anga atitûtaraga ta tûrî ageni? N'ûntû n'atwendeetie, na aarîa mbia. 16 Ûtonga bûra bunthe Ngai atuunyîîte baaba i bwetû na aana beetû; kwoogu îîndî, rûtha bunthe bûra Ngai akwîrîîte.”
17 Kwoogu Njakubu aûkîîra, aatwethia aana baake na eekûrû nkamîîraani; 18 na aathingatîria nyamû ciake cia ndîîthia cionthe, amwe na ûtonga bunthe bûra aarî agwîcwîra Pandani-Aramu aathi kîrî îthe Isaka nthîgûrû ya Kanaani.
19 Rabani akûthi kwenja ng'ondu ciake, Raeri aiya ngai cia mûciî wa îthe. 20 Nkûrûki ya ûgu, Njakubu eeneeria Rabani Mûaramu ataamûmenyithia n'aatoorookeete. 21 Kwoogu aatoorookire na bionthe bira aarî nabio, na aaringa muuro wa Yufîrîti na aathi bwa irîma bia nthî ya Ngiriandi.
Rabani aathingata Njakubu
22 Ntugû ya ithatû Rabani eerwa Njakubu n'aratoorokire. 23 Aathûkia antû baao, eengana na Njakubu ntugû mûgwanja na amûgwatagwatîra irîmaani bia Ngiriandi. 24 Îndî mbere Rabani Mûaramu aaria na Njakubu, Ngai amuumîîra kîrootooni ûtugû na amwîra, “Menyeera ûtikeere Njakubu ûntû nwa bûrîkû bûûthûûku.”
25 “Rabani aagwatagwatîîre Njakubu irîmaani bia Ngiriandi, naara Njakubu aarî akwamba marema. Rabani kinya we aamba marema noogo amwe na antû ba mûciî wao.” 26 Rîru Rabani aûria Njakubu, “N'ata ûrûthîîte, waambeneeria na wakamata aarî baakwa ta agwate ndûani? 27 I kî n'ûntû waatoorokire gîîciri ûtaambîîra nkûrûthîra kîatho gîa gûkwîra i bwega ngîkwinagîra nyîmbo na tamburini na wandîndî cia ndigi inyingî? 28 Ûtaareka nwa ncunca bacûûcû na aarî baakwa mbeera bathi bwega. N'ûrûthîîte ûntû bwa waa. 29 Ndî na watho bwa gûkwinyîîria; îndî ûtugû Ngai wa abaagu arambîîrire, ‘Ûmenyeere ûtikeere Njakubu ûntû nwa bûrîkû bûûthûûku.’ 30 Imbiyî wathiire n'ûntû n'wendaga mûno gûcooka mûciî wenu, îndî i mbi n'ûntû waiyire ngai ciakwa?”
31 Njakubu acookia Rabani, “I ndaakuthûkire, n'ûntû ndaathûgaaniirie ûgaantuunya aarî baaku nainya. 32 Îndî ûkaaya kwona nwa ûmwe arî na ngai ciaku, nakaûragwa. Mbere ya antû beetû onania kîra gîaku ndî nakîo, na wegua kûrî kîo ûthûkie.” Rîru Njakubu ataamenyaga kana Raeri naiyîîte ngai cia îthe.
33 Kwoogu Rabani aathûûngîra îremaani rîa Njakubu, rîa aruti ngûgî ba aarî, na rîa Rea, îndî ataaciona. Auma îremaani rîa Rea, aathûngîra rîa Raeri. 34 Îîndî Raeri n'athûkîîtie ngai cia mûciî wa îthe na aciîkîra mûbukooni wa nkamîîra, na acikarîra. Rabani auria îremaani kunthe, îndî ataaciona. 35 Raeri eera îthe, “Baaba, ûtikaathûûre i bûra ntakûrûngama; i ka ndî na nyambura.” Kwoogu aaraitha îndî ataûmba kwona ngai cia mûciî wake.
36 Njakubu aathûûra mûno aatogotera Rabani, amûûria, “I mabîtia mabi nkûrûthîrîte, i meeyia mabi ndûthîîte kîrî woû n'ûntû ûthiingatanîîte naani ûûgû? 37 Îîndî n'ûntû ûkûraitha intooni biakwa bionthe rî, i mbi wona ya mûciî waku? Mîaige aaga mbere ya antû beenu na baakwa, na batûtuîre îgamba.”
38 “Nkarîîte naawe mîanka mîrongo îîrî îîndî ûgu. Ng'ondu ciaku na mbûri itauna, kana ndîa ntûrûme kuuma ndîîthiani ciaku. 39 Ntaakûreaga nyamû ciatembûrangawa i nyamû cia kîthaka? Ti niû ndaarîaga acaara? Wandandûkaga kîra kîonthe kîaiyagwa mûthenya kana ûtugû. 40 Kûrî mûthenya ndaakaraga nkîthithinaga, na ntikîûmba kûmaama ûtugû n'ûntû bwa mpîo. 41 Gwakarîkire ûgu mîanka înu mîrongo îîrî îra ndaakarire gwaku. Ndaakûrutîîre ngûgî mîanka îkûmi na îna n'ûntû bwa aarî baaku baîrî na mîanka îthanthatû n'ûntû bwa ndîîthia cia mbûri na ng'ondu, na wagarûra mûcaara wakwa maita îkûmi. 42 Ûkaaya kwîgua Ngai ûra cûûcû Îburaîmu na baaba Isaka baagongaga ataarî naani, ûmma wayaga kûreka nkathi njara i ntheri. Îndî Ngai nooneete guutîka na kûruta ngûgî nainya na njara ciakwa, na ûtugû naragûkaaniirie.”
43 Rabani aacookeria Njakubu, “Eekûrû baba n'aarî baakwa, aana nabo i bacûûcû, na nyamû ino cia ndîîthia i ciakwa. Kîra kîonthe ûkwona ûkîoneete kuumania naani. Îndî n'ata mbûmba kûrûtha îgûrû rîa aarî baba baakwa, kana aana bara baciere? 44 Ncû îîndî, ga tûrûthe kîrîîkanîro, woû na niû, na gîtuîke ûkûûyî gatîgatî gaakwa na woû.”
45 Kwoogu Njakubu aathûkia iiga, na arîrûûngîka ta gîtugî. 46 Na Njakubu eera antû baake, “Îthîraniani maiga.” Kwoogu baathûkia maiga, baûmba kîthûmba; na baarîîra irio agu kîthûmbaani gîku kîa maiga. 47 Rabani agîîta Njegari Saandutha,a nwe Njakubu agîîta Ngareendi.b 48 Rabani auga, “Kîthûmba gîkî n'ûkûûyî gatîgatî gaaku na niû îmunthî.” I ntûma gîetirwe Ngareendi. 49 Eetwa kaîrî Misipa,c n'ûntû augire, “Mwathani arooraithaga gatîgatî gaaku na niû rîra gûtarî we arî akubî na ûra ûngî. 50 Ûkaaya kwinyîîria aarî baakwa kana ûkagûra aka bangî, nwa ndege kûmenya, îndî ririkana, Ngai n'we mûnkûûyî wetû twinthe woû na niû.”
51 Rabani eera Njakubu, “Gîkî i kîthûmba, na gîkî i gîtugî ndaiga gatîgatî gaaku na niû. 52 Kîthûmba gîkî n'ûkûûyî, na gîtugî gîkî n'ûkûûyî, atî ntiikûrûka kîthûmba gîkî mbûyîîte kîrî woû, na ûtiikûrûka kîthûmba gîkî na gîtugî ûûyîîte kûûmbaaria. 53 Ngai wa Îburaîmu na Ngai wa Naori arootûtuîra.”
Kwoogu Njakubu athiîtia riîtwani rîa Ngai wa îthe Isaka, 54 na Njakubu aarutîra kîgongwana kîrîmaani na eeta antû baao baarîa; na baarîa mûgaate na baaraara kîrîmaani ûtugû bunthe.
55 Rûûni rûkîîrî Rabani aûkîîra, aacunca aana ba aana baake na aarî baake na abathaarima, rîru acooka eenûka.