30
1 Rîra Raeri oonire atigûciarîra Njakubu twana, aatua kwîgîîrua mwaragina rûriitho. Kwoogu eera Njakubu, “Mpa twana, wegua t'ûgu ngaakua!”2 Njakubu athûûra i Raeri amûûria, “Ka ndî Ngai, ûra ûkûrigîîrîîtie kûgîa na twana?” 3 Rîru amwîra, “N'ûyû Mbiria, mûruti ngûgî wakwa, maama n'we kaingo anciarîra twana na gûkûrûkîîra we mbîgue ndî na mbeû kinya niû.” 4 Kwoogu amwaa mûruti ngûgî wake Mbiria ta mwekûrû; na Njakubu aamaama n'we. 5 Na Mbiria aagîa nda na aaciarîra Njakubu kaana ga kaîyî. 6 Rîru Raeri auga, “Ngai akûngambîîra, na akwîgua kayû gaakwa na aampa kaîyî.” Kwoogu ageeta Ndani.a 7 Mbiria mûruti ngûgî wa Raeri aagea nda kaîrî na aaciarîra Njakubu kaîyî ga twîrî. 8 Rîru Raeri auga, “I nkiindanîîte na mwarayia nkiindano înene, na ndaûmbana.” Kwoogu ageeta Nabutarî.
9 Rîra Rea oonire atî n'atigîîte kûgîa na twana, aathûkia mûruti ngûgî wake Ciripa aneenkera Njakubu ta mwekûrû. 10 Rîru mûruti ngûgî wa Rea, Ciripa aaciarîra Njakubu kaîyî. 11 Na Rea auga, “N'aata ndî na mûnyaka!” Kwoogu ageeta Ngandi. 12 Ciripa mûruti ngûgî wa Rea aaciarîra Njakubu kaîyî ga twîrî. 13 Rea auga, “I nkeneete! N'ûntû eekûrû bakaambîta ûmûkenu.” Kwoogu ageeta Aseri.
14 Îgiita rîa maketha ma ngano, Rubeni aathi mûndaani oona matunda ma wendo, aaretera gina Rea. Raeri eera Rea, “Itû ndûmia matunda mamwe ma wendo ma mwana waku.” 15 Îndî amûcookia, “Ka bûtarî bûganu kuiya mûkûrû wakwa? Ûthûkie matunda ma wendo ma mwan'wakwa namo?” Raeri amwîra, “Nwa amaame naawe îmunthî rîrî îrîi rîa matunda ma wendo ma mwan'waku.”
16 Kwoogu rîra Njakubu aayire aumîîte mûndaani ûgoro, Rea aumagarûka kûmûthagaana, amwîra, “Nwa mwanka ûmaame naani îmunthî! N'ûntû i ngûkomborire na matunda ma wendo ma mwan'wakwa.” Kwoogu amaama n'we ûtugû bûbu. 17 Na Ngai eegua Rea, aagîa nda aaciarîra Njakubu kaîyî ga tûtaano. 18 Rîru Rea auga, “Ngai agûûmpa kîewa n'ûntû bwa kûnenkanîra mûruti ngûgî wakwa kîrî mûkûrû wakwa.” Kwoogu ageeta Isakaari.
19 Rea aagîa nda kaîrî na aaciarîra Njakubu kaîyî ga tûthanthatû. 20 Rîru auga, “Ngai agûmpa kîewa kîîthongi. Îgiita rîrî mûkûrû wakwa akanthûkia na gîtîîyo, n'ûntû nkûmûciarîra aîyî bathanthatû.” Kwoogu ageeta Seburuni.
21 Nyumaani, aaciara kaarî na ageeta Ndina.
22 Rîru Ngai eegîîrua Raeri kîao, amûthikîîria na aarugûra nda yake. 23 Aagîa nda aaciara kaîyî auga, “Ngai akûûnthambia îgi.” 24 Ageeta, Njosebu, auga, “Mwathani aroomboongeera kaîyî kangî.”
Nyamû cia ndîîthia cia Njakubu ciathagaya
25 Nyuma ya Raeri agûciara Njosebu, Njakubu eera Rabani, “Ndekeeria nthi kaingo mbînûka gwetû. 26 Nenkera eekûrû baakwa na aana, bara ndararutagîra ngûgî, mbaanjîîrie rûgendo. Nwiyî bûra nkûrutîrîîte ngûgî bûgana.”
27 Îndî Rabani amwîra, “Wegua nwa ûmbîtîgîîrie, itû karaanga. I menyeete Mwathani anthaarimîîte n'ûntû bwaku.” 28 Aathi na mbere amwîra, “Uga mûcaara waku ûra ûkwenda, na ngakûrea uu.”
29 Njakubu amwîra, “Nwiyî bûra nkûrutîrîîte ngûgî na bûra nyamû ciaku cia ndîîthia ikarîîte bwega ruungu rwa ûmenyeeri bwakwa. 30 Ira nkai warî nacio mbere mbûya i ciathagayire mûno, Mwathani n'akûthaarimîîte bantû onthe ndareegagua ndî. Îndî îîndî, irî nkaaro rûthîra mûciî wakwa ûntû?”
31 Rabani aûria, “I mbi ngaakwa?” Njakubu amûcookeria amwîra, “Ûtigampe nwa mbi, îndî wegua ûkaandûthîra ûntû bûbû, nkaathi na mbere kûraithîra na kûmenyeera ndîîthia ciaku. 32 Reka nkûrûkîîre ndîîthia ciaku cionthe îmunthî, nkîathûraga ng'ondu ira cionthe irî na marooro na macîgî na ntûrûme înjirû yonthe, na mbûri îrî na marooro na mîtabû mbûriini ciaku, na inu i cio ûkeegua irî mûcaara wakwa. 33 Na ûmma bwakwa bûgaankûûyîîra nyumaani, rîra rîonthe ûkaaraithaga mûcaara ûra ûndîîte. Mbûri yonthe ûrîîthiini bwakwa îra îtarî na marooro kana mîtabû, kana ng'ondu yonthe îtarî na rangi înjirû, uuge, ‘Îno nîrî mbiye.’ 34 Rabani auga, ‘I bwega! Ga gûkarîke woogu wauga.’ 35 Îndî ntugû înu Rabani aathûra nthenge ira ciarî na mîtabû na marooro, na mîgoma îra yarî na macîgî na marooro, yonthe îra yarî na ûyerû, na ntûrûme yonthe îra yarî înjirû, na eera aana baake bacimenyeere. 36 Nabo baathi nacio bantû a rûgendo rwa ntugû ithatû kuuma ara Njakubu aarî. Njakubu aathi na mbere kûmenyeera nyamû ira cingî cia ndîîthia cia Rabani.”
37 Njakubu aatema mîraagi îmîîthî ya mûtî wetagwa mûrûbina, na îngî ya arimondi na ya mwaramoni aûyia ikonde gûntû kûmwe agîtigaga gûntû kûra kûngî na kwoogu îkoonekanagia îrî na mîgîîra îmîyerû. 38 Aiga mîraagi înu aûyîîtie mbere ya ndîîthia tûkongorooni, ara ndîîthia inu ciayaga kûnyuîra rûûyî. Na n'ûntû i ciatweyanaga rîra ciayaga kûnyua, 39 ciatweyanagîra mbere ya mîraagi înu. Na kwoogu igaciara tûbûri tûrî na mîtabû, marooro, na macîgî. 40 Ng'ondu imwe ira Njakubu aarîîthagîria Rabani, i ciarî marooro. Na rîra ciakinyia rîa gûtwegwa, aacierekagîria rûteere rûra ira irî marooro kana injirû irî. Na njîra îno Njakubu aagîta ng'ondu imbingî mûno na atairinganîra na ira ciingî. 41 Rîra ng'ondu ira irî na inya ciatweyanagîra aakubî na ara cianyunyagîra rûûyî, n'atigaga akwona mîraagi îra yarî na marooro îrî oogo. 42 Îndî atikîaiga mîraagi înu rîra ng'ondu ira itarî na inya ciatweyanaga. Kwoogu Njakubu aagîta ng'ondu cionthe ira mbega na Rabani n'we aagîta ira itarî na inya. 43 Nyuma ya kagiita gaakai Njakubu atuîka gîtonga kîînene mûno. Aagîta ng'ondu, mbûri, nkamîîra, mang'ooi na nkombo imbingî mûno.