Njakubu aakinya mûciî wa Rabani
29
1 Rîru Njakubu aathi na mbere na rûgendo rwake na aakinya nthîgûrû ya antû ba uumîîro bwa riûa. 2 Naagu oona kîthima kîthakaani, na ikundi bithatû bia ûrîîthi bwa ng'ondu bimaami akubî nakîo n'ûntû ndîîthia cianyuithagua kîthimaani gîku. Iiga rîra rîakunîkîîte mûromo wa kîthima irîarî rîînene. 3 Rîra ndîîthia cionthe ciethîrana agu, i rîo arîîthi baingiritagia iiga rîkauma mûromooni wa kîthima na bakanyuithia ng'ondu. Rîru bagacookia iiga bantû aarîo mûromooni wa kîthima.4 Njakubu aûria arîîthi, “Aruayia, buumîîte kû?”
Baacookia, “Tuumîîte Arani.”
5 Abaûria, “I bwiyî Rabani, mwana wa mwana wa Naori?”
Baacookia, “Yîî itûmwiyî.”
6 Rîru Njakubu abaûria, “N'ûmwega?”
Bacookia, “Yîî n'ûmwega, wana n'ûûra mwar'wake Raeri aayîîte na ng'ondu.”
7 Auga, “Raitha, riûa rîrî îgûrû; ti thaa cia nyamû cia ndîîthia kwîthîranua. Nywithiani ng'ondu na bûcicookie rûriîni ikarîe.”
8 Îndî baacookia, “Tûtirûtha ûgu mwanka cionthe ikinye aaga, na iiga ringiritue kuuma kîthimaani.”
9 Njakubu wa akîaragia na antû babu, mwarî wa abuue Raeri aakinya athiingatîrîîtie ng'ondu cia îthe. 10 Rîra Njakubu aamwonire na ng'ondu cia abuue, aingiritia iiga na aanyuithia ng'ondu. 11 Rîru Njakubu akumbatîria Raeri na aarîra nainya i gîkeno. 12 N'aarî akwîra Raeri aarî wa ndûgû cia ba îthe na aarî mwana wa Rebeka. Kwoogu Raeri augia na aathi kwîra îthe.
13 Rîra Rabani aîgiirue mantû ma Njakubu mwana wa mwaragina, augia kûmûthagaana, amûkuumbata, amûcunca na amûreeta mûciî gwake. Njakubu eera Rabani mantû mamu monthe, 14 Rabani amwîra, “N'ûmma ûrî nthakame na nyama ciakwa!”
Njakubu aagûra Rea na Raeri
Nyuma ya Njakubu agûkara naagu mweri ûmwe, 15 Rabani amûûria, “N'ûntû ma ûrî wa ndûgû ciakwa, n'ûkandutîra ngûgî mana? Mbîîra bûra mûcaara waku ûkeegua ûgana?”
16 Rabani aarî na aarî baîrî; ûra mûkûrû eetagwa Rea, na ûra mûniini eetagwa Raeri. 17 Meetho ma Rea mataarî meega i maagariî, îndî Raeri aarî nthongama na naûmbîîtwe bwega. 18 Njakubu n'endeete Raeri; na auga, “Ngakûrutîra ngûgî mîanka mûgwanja n'ûntû bwa Raeri.” 19 Rabani auga, “Na kaaba ngakwaa we nkûrûki ya kwaa muntû ûngî; kara aaga naani.”
20 Kwoogu Njakubu aaruta ngûgî mîanka mûgwanja kaingo eewa Raeri, îndî yaakarire ta ntugû inkai kîrî we n'ûntû bwa bûra aamwendeete. 21 Rîru Njakubu eera Rabani, “Mîanka mûgwanja îkûthira, nenkera mwar'waku îîndî atuîke mwekûrû wakwa.”
22 Kwoogu Rabani aarûtha kîatho kîa mûranû na eeta antû bonthe. 23 Îndî ûgoro bûgûkinya, aathûkia Mwar'wake Rea airîra Njakubu na aamaama n'we. 24 Rabani aneenkanîra mwarî wake wa ngûgî Ciripa kîrî mwar'wake Rea arî mwar'wake wa ngûgî. 25 Gûgûkîa rûûni rûkîîrî Njakubu oona i Rea aarî! Aûria Rabani, “I mbi îno wandûthîra ûûgû? Ndaakûrutîîre ngûgî n'ûntû bwa Raeri, tibu? I kî n'ûntû ûrambeneerie?”
26 Rabani acookia, “Ti wîthîre bwetû gûkû kûgûrîrwa mwarî ûra mûniini mbere ya ûra mûkûrû. 27 Thiria kiumia gîkî kîa wiki na mwarî ûyû; rîru tûkûe kinya ûra mûniini, ûrîe na kûruta ngûgî mîanka îngî mûgwanja.”
28 Na Njakubu aarûtha bu. Aathiria kiumia gîku na Rea, na rîru Rabani amwaa mwarî wake Raeri aatuîka mwekûrû wake. 29 Rabani aanenkera Raeri mwarî wake wa ngûgî ûra eetagwa Mbiria arî mûruti ngûgî. 30 Njakubu aamaama na Raeri kinya we, na amwenda nkûrûki ya Rea. Na aarutîra Rabani ngûgî mîanka îngî mûgwanja.
Aana ba Njakubu
31 Rîra Mwathani oonire Rea ateendeetwe, aarugûra nda yake, îndî Raeri aakara arî nthaata. 32 Rea aagîa na nda na aaciara kaîyî. Ageeta Rubeni,a n'ûntû augire, “I bûra Mwathani akwona kînyamaara gîakwa. Ûmma mûkûrû wakwa akaambeenda îîndî.”
33 Aagîa nda kaîrî, na akûgîa na kaana ga kaîyî auga, “N'ûntû Mwathani neegîîtue mûkûrû wakwa atimbendete, agûmpa gaka kaîrî.” Kwoogu ageeta Simioni.
34 Aagîa nda kaîrî, na agûciara kaîyî auga, “Mûthiani buru, mûkûrû wakwa akaagwatithanua naani, n'ûntû nkûmûciarîra aîyî bathatû.” Kwoogu geetwa Rawi.
35 Aagîa nda kaîrî, na rîra aaciarire kaîyî auga, “Kagiita gaka ngaakumia Mwathani.” Kwoogu ageeta Njunda. Rîru aatiga kûgîa na aana.