28
1 Kwoogu Isaka aatûmana Njakubu aaya na amûthaarima na amwatha amwîra, “Ûtikaagûre mwarî Mûkanaani. 2 Kaaba ûkathi Pandani-Aramu, mûciî wa ûyûûgu Bethueri, ûkagûra ûmwe wa aarî ba noogo, ûmwe wa aarî ba abuugu Rabani. 3 Ngai Mwene Inya yonthe aroobûthaarima agatûma bûciarana na mûtari wenu wongeereka mwanka bûtuîka mûgongo wa antû. 4 Aroobwa amwe na nciarwa cienu ithaarimo bira aapeere Îburaîmu, kaingo bwîgwatîra nthî îra bûtwîre îîndî bûrî ageni, nthî îra Ngai aapeere Îburaîmu.” 5 Rîru Isaka aarekeeria Njakubu, na aambîîria rûgendo rwa kûthi Pandani-Aramu, kwa Rabani mwana wa Bethueri Mûaramu, mûruagina wa Rebeka, ûra aarî gina wa Njakubu na Esaû.Esaû aagûra mûka ûngî
6 Esaû amenya Isaka naarî akûthaarima Njakubu, na amwîra athi Pandani-Aramu kûgûrana noogo, na rîra aamûthaarimire aamwathire amwîra, “Ûtikaagûre mûka Mûkanaani,” 7 na Njakubu aathîkîra îthe na gina na aathi bwa Pandani-Aramu. 8 Kwoogu rîra Esaû oonire eekûrû bara Akanaani bataakenagia îthe Isaka, 9 Esaû aagûra mwarî wa Isumairi ûra eetagwa Maarathi mwaragina wa Nebaiothi ûyûûe wa Îburaîmu.
Kîrooto kîa Njakubu arî Betheri
10 Njakubu naarî akuuma Beeriseba athiîte bwa Arani. 11 Na aakinya bantû ana, aaraara oogo ûtugû bûbu, n'ûntû riûa irîarî rîkûthûa. Aathûkia iiga rîmwe oogo, aarîîria kîongo aamaama. 12 Na aaroota akîonaga ngaati îkinyîîte nthîgûrû, na yatongithia îgûrû; na oona araîka ba Ngai bagîîtagia na bakîîndamaga n'yo. 13 Mwathani aarûngi agu îgûrû rîayo, na auga, “I niû Mwathani, Ngai wa ûyûûgu Îburaîmu na Ngai wa abaagu Isaka. Ngakûa amwe na nciarwa ciaku nthîgûrû înu ûmaami. 14 Nciarwa cienu ikeegua irî mbingî ta tîîri ya nthîgûrû, na bûgaataamba bwa uumîîro bwa riûa na ûthwîro bwa rîo, bwa mbarî ya îgûrû na bwa iti. Antû bonthe nthîgûrû bakaathaarimwa gûkûrûkîîra woû na mbeû yaku. 15 Nkeegua ndî amwe naawe rîonthe na ngakûmenyeera bantû onthe ara ûkaathi, na ngagûcookia nthî îno. Ntigûtiga mwanka ndûthe wîrane bûra ndaigire naawe.”
16 Rîru Njakubu aûka kuuma torooni auga, “Ûmma Mwathani arî bantû aaga; na ntiraiyî.” 17 Njakubu aamakîîte auga, “N'ata bantû aaga arî a magegania! Aaga t'angî tatiga i Nyomba ya Ngai; ûyû i mwîrango wa îgûrû.”
18 Rûûni rûkîîrî Njakubu aathûkia iiga rîra aarîîrîîtie kîongo gîake na arîrûûngîka ta gîtugî arîîtûûrîria maguta îgûrû, arîathûrîra Ngai. 19 Eeta bantû agu Betheri, i ta kuuga Nyomba ya Ngai. Îndî ntûûra înu yeetagwa Rusi mbere. 20 Rîru Njakubu aathiîtia, auga, “Ûkaaya kwîgua Ngai ûkeegua ûrî amwe naani, na ûûmenyeere rûgendooni rûrû nthiîte na ûûnenkere irio bia kûrîa na nguo cia gwîkîra 21 na ûncookie mûciî kwa baaba ndî na thîîrî, rîru Mwathani ûkeegua ûrî Ngai wakwa, 22 na iiga rîrî ndaarûngîka rîrî gîtugî, ûkeegua rîrî bantû a kûrombagîra Ngai na kîonthe kîra ûgaampa ngakûrutîra gîcuncî gîa îkûmi.”