Isaka aathaarima Njakubu
27
1 Rîra Isaka aakûrire na meetho maake maathira inya maatiga kwona, eeta Esaû mwana wake ûra mûkûrû amwîra, “Mwan'wakwa.” N'we aacookia amwîra, “Yîî, i nthikîîrîîtie.”2 Isaka amwîra, “Îîndî niû ndî mûkûrû na ntiiyî ntugû ya gûkua gwakwa. 3 Wîrûtha ûgu îîndî, ûthûkie thiaka yaku, ûta na mîgwî na uumagarûke ûthi kîthakaani ûkaguîme ûmbûragîre nyamû îmwe. 4 Ûnthuuranîre twirio tweega tûra mbendeete na ûndetere ndîe, kaingo nkûthaarima mbere nkua.”
5 Îndî Rebeka naathikîîrîîtie wa bûra Isaka aaragia na mwan'wake Esaû. Rîra Esaû aathiire kîthakaani kûguîma nyamû areeta, 6 Rebeka eera mwan'wake Njakubu, “Ndareegiirue abaagu akîîra mûruanyûkwe Esaû ata rî, 7 ‘Ndetera nyama cia nyamû cia kîthaka na ûnthuuranîre twirio tweega ndîe, kaingo nkûnenkera ithaarimo bia Mwathani, mbere nkua.’ 8 Îîndî mwan'wakwa, thikîîria bwega na ûrûthe bûra ngaakwîra: 9 Umagarûka ûthi naara ûrîîthiini ûnthuurîre tûbûri twîrî twothe, kaingo mbûmba kûthuuranîra abaagu twirio twega, wa tûra eendaga. 10 Rîru wirîre abaagu arîe, kaingo akûthaarima mbere akua.”
11 Njakubu eera gina Rebeka, “Nwiyî, mûruayia Esaû arî na guaya, na niû nkoonde yakwa n'întenderu. 12 Î baaba akaaya gûntongithia? Ngaakara ta nkûmweneeria na nwa ndîîretere kîrumi bantû a kîthaarimo.”
13 Gina amwîra, “Mwan'wakwa, ga kîrumi gîku kîîngwate. Woû îthi ûrûthe ûgu ngûkwîra; îthi ûndetere tu.”
14 Kwoogu aathi atugîîra aareetera gina, na aathuuranîra twirio tweega, wa bûra îthe eendaga. 15 Rîru Rebeka aathûkia nguo ira mbega mûno cia mwan'wake ûra mûkûrû Esaû, ira aarî nacio nyomba yake, na eekîra mwan'wake ûra mûniini Njakubu. 16 Aacooka aaguîkîra njara ciake na nkingo kûra kwarî gûtenderu na njûo cia tûbûri tûtu. 17 Rîru aanenkera mwan'wake Njakubu twirio tûra twega na mûgaate ûra aarugîîte.
18 Aathi kîrî îthe amwîra, “Baaba.” Aacookia, “Îî mwan'wakwa, n'ûû?”
19 Njakubu eera îthe, “Ndî Esaû mwan'waku ûra mûkûrû. Nkûrûtha wa bûra ûkûmbîîrîîte. Itû ûkîîra ûkare nthî ûrîe nyama cia wathi kaingo ûnthaarima.”
20 Isaka amûûria, “N'ata wacionanga na mpwî ûgu mwan'wakwa?” Aacookia, “Mwathani Ngai waku n'ampeere kûûmbana.”
21 Rîru Isaka eera Njakubu, “Ncû akubî nkûringithie, mwan'wakwa, menye wegua waabu ûrî mwan'wakwa Esaû kana arî.” 22 Njakubu aathi akubî na îthe Isaka, n'we amûtongithia auga, “Kanyua i ka Njakubu îndî njara i cia Esaû.” 23 Ataamûmenya, n'ûntû njara ciake ciarî na guaya ta cia mûruagina Esaû. Kwoogu mbere amûthaarima 24 amûûria, “Waabu i woû mwan'wakwa Esaû?” N'we aacookia, “Îî i niû.”
25 Rîru auga, “Mwan'wakwa, ndetera nyama ciaku cia wathi ndîe, kaingo nkûthaarima.”
Njakubu amûneenkera aarîa, na amûneenkera ndibei n'yo aanyua. 26 Rîru îthe Isaka amwîra, “Ncû aaga, mwan'wakwa ûnkuumbatîrie.”
27 Kwoogu aathi kîrî we na amûkuumbata. Rîra Isaka eegiirue mûruke wa nguo ciake, amûthaarima auga, “Îî, mûruke wa mwan'wakwa ûkari ta mûruke wa mûnda ûra Mwathani athaarimîîte. 28 Ngai arookwaa maame ma îgûrû na ûnoru bwa nthîgûrû, wingî bwa irio na bwa ndibei. 29 Mîgongo îroogûtûmîkîra na antû bagagûturîria maru. Tuîka mwathi wa aruanyûkwe, na aruanyûkwe barookwîndamîîra. Bara bakûrumaga baroorumwa na bara bakûthaarimaga baroothaarimwa.”
30 Nyuma ya Isaka akûrîîkia kûthaarima Njakubu, na Njakubu auma ara îthe aarî, mûruagina Esaû aathûngîra aumîîte kûguîma. 31 Kinya we aathuuranîra twirio tweega na aareetera îthe. Rîru amwîra, “Baaba, ûkîîra ûrîe nyama ciakwa cia wathi kaingo ûnthaarima.”
32 Îthe Isaka amûûria, “Ka ûrî ûû?” Aacookia, “I niû mwan'waku ûra mûkûrû Esaû.”
33 Isaka aathetema nainya mûno na aûria, “Aabu n'ûû ûra ûguîmire nyamû na aandeetera? Ndamîrîa mbere ûûya na ndamûthaarima na ûmma akaathaarimwa!”
34 Rîra Esaû eegiirue mîgambo ya îthe, aatumûra mbu na aarîra na ngoga mûno na eera îthe, “Nthaarima kinya niû baaba!” 35 Isaka auga, “Mûruanyûkwe aayire aambeneeria na aathûkia kîthaarimo gîaku.” 36 Esaû n'we auga, “Atiîtagwa Njakubu? N'ambeneereetie maita maîrî: N'aathûkiirie ûtûra îria bwakwa, na îîndî akûthûkia kîthaarimo gîakwa!” Rîru aûria, “Gûtirî nwa kîthaarimo ûraantigarîria?”
37 Isaka aacookeria Esaû amwîra, “Nkûmûtuîkithia mwathi waku na ndaatuîkithia nciarwa ciaku cionthe aruti ngûgî ba nciarwa ciake, na kaîrî ndamûthiîtîria irio na ndibei. Kwoogu îndî n'ata ûkwona mbûmba gûkûrûthîra mwan'wakwa?”
38 Esaû aûria îthe, “Ka ûrî na kîthaarimo kîmwe akî baaba? Nthaarima kinya niû baaba!” Rîru Esaû aarîra nainya.
39 Îthe Isaka amûcookeria amwîra,
“Ûtûûro bwaku ûkeegua bûrî
kûraaya na ûtonga bwa nthî,
kûraaya na maame ma îgûrû.
40 Ûgaatûûrua n'inya ya rûûyiû
na ûgaatûmîkîra mûruanyûkwe.
Îndî rîra ûkaanoga,
ûkaaruta îcoki rîake
kuuma nkingo yaku.”
Njakubu atoorokera kwa ba Rabani
41 Esaû eegua arî na ûthû na Njakubu n'ûntû bwa kîthaarimo kîra eerwe n'îthe. Eebîîra, “Ntugû cia kûrîrîra baaba irî akubî; rîru mbûrage mûruayia Njakubu.”
42 Rîra Rebeka eerirwe bûra mwan'wake ûra mûkûrû Esaû augîîte, aatûmana mwan'wake ûra mûniini Njakubu amwîra, “Mûruanyûkwe Esaû n'akwîbûmîîria na mathûgaania ma gûkûûraga. 43 Kwoogu îîndî, mwan'wakwa, rûtha bûra ngûkwîra, toorokera Arani kwa mûruayia Rabani nthûti îmwe. 44 Ûkaraange wake kagiita gaakai mwanka mûthûûro wa mûruanyûkwe ûgwîrîîre. 45 Rîra mûthûûro wa mûruanyûkwe kîrî woû ûkaathira na ariganîrue i bûra waamûrûthîîre, ngagûtûmana ûcooke uume noogo. I mbi îgaatûma bûmbûra mana biû bûrî baîrî na ntugû îmwe?”
46 Rîru Rebeka eera Isaka, “Eekûrû ba Esaû bara Aiti i bagûtûma ûtûûro bwakwa bûûma mûno. Îndî Njakubu n'we akaaya kûgûra mûka Mûiti, i kaaba naani ngakua.”