Kîambîrîria 26

Isaka atûûra Gerari

1 Îgiita rîmwe, i kwarî na yûûra nthîgûrû înu, ta rîra rîarî oogo mbere îgiitaani rîa Îburaîmu. Na Isaka aathi Gerari, kîrî Abimereki mûnene wa Afirisiti. 2 Na Mwathani amuumîîra, amwîra, “Menya wîndama Miisiri; tûûra nthîgûrû îra ngaakwîra. 3 Karaanga nthîgûrû îno gwa kagiita gaakai, na nkeethîrwa ndî amwe naawe, na ngakûthaarima. N'ûntû nkeeyana nthî îno yonthe kîrî woû na nciarwa ciaku, na nkaûyûria mûthiîtio ûra ndaathiîtîîrie abaagu Îburaîmu. 4 Nkaathagayia nciarwa ciaku ta nthata cia îgûrû, na neenkere nciarwa ciaku nthî ino cionthe; na gûkûrûkîîra mbeû yaku mîgongo yonthe ya nthîgûrû îkaathaarimwa, 5 n'ûntû Îburaîmu naambathîkîîre na aiga mawendi maakwa, maathana maakwa, na mawatho maakwa.”

6 Kwoogu Isaka atûûra Gerari. 7 Rîra antû arûme ba gûntû gûku baamûûriirie mantû ma mwekûrû wake, abeera, “I mwarayia,” n'ûntû naakuthûkaga kuuga, aarî mwekûrû wake akîthûgaanagia, “Antû ba gûntû gûkû bakaambûraga n'ûntû bwa Rebeka, n'ûntû n'ûmûthoongi.”

8 Isaka naakarangîîte noogo gwa kagiita kaganoona, rîru ntugû îmwe Abimereki mûnene wa Afirisiti aaraithîîria na ndirica oona Isaka agîataata mwekûrû wake Rebeka. 9 Kwoogu Abimereki eeta Isaka, amwîra, “Na mma i mwekûrû waku! I kî aabu n'ûntû ûraugaga i mwaranyûkwe?” Isaka amwîra, “I ndaakuthûkire kûûragwa n'ûntû bwake.” 10 Rîru Abimereki amûûria, “I mbi îno ûtûrûthîîte ûûgû? Ûmwe wa antû baakwa nwa wîgue amaamîîte na mwekûrû waku, na ûgatûma wîgua tûrî na meeyia.” 11 Rîru Abimereki aaruta watho kîrî antû bonthe auga, “Muntû n'wa ûmwe ûra agaatonga muntû ûyû kana mwekûrû wake n'akaûragwa.”

12 Na Isaka aanda irio nthîgûrû înu mwankaani ûyu, na aaketha maita îgana nkûrûki ya bira aandîîte n'ûntû Mwathani n'amûthaarimire. 13 Isaka aagîa na into biingî mûno na kwoogu aatuîka muntû ûmûtongu mûno. 14 N'ûntû n'aarî na ndîîthia imbingî cia ng'ondu, mbûri, ng'ombe na nkombo. Afirisiti i baamwîgagua rûriitho. 15 Kwoogu ithima bionthe bira aruti ngûgî ba îthe Îburaîmu beenjîîte rîra aarî mwoyo, Afirisiti baathika. 16 Kwoogu Abimereki eera Isaka, “Îthi uume aaga gwetû; n'ûragîîre na inya mûno nkûrûki yetû.” 17 Kwoogu Isaka auma noogo, aamba marema kîbondeeni kîa Gerari na aatûûra oogo. 18 Isaka eenja ithima bia rûûyî kaîrî bira bienjîîtwe rîra îthe Îburaîmu aarî mwoyo; n'ûntû Afirisiti i baarî bakûbithika Îburaîmu agûkua; na abiîta mariîtwa wa mara îthe Îburaîmu aabiîtîîte.

19 Îndî rîra aruti ngûgî ba Isaka beenjaga kîbondeeni beethîra kînyaka kîa rûûyî rwega oogo. 20 Îndî arîîthi ba Gerari baathetania na arîîthi ba Isaka bakîbeeraga, “Rûûyî rûrû i rwetû!” Kwoogu eeta kîthima gîku Eseki, n'ûntû i baakararaniirie n'we. 21 Nyuma yoogu, beenja kîthima kîngî kîa biîrî, îndî kinya kîo baakararanîria; kwoogu bagîîta Sitina. 22 Aathaama kuuma agu na eenja kîthima kîngî kîa bithatû, na bataakîthetera. Kwoogu agîîta Reobothi, “Îîndî Mwathani agûtûnenkera mwanya.” N'ûntû augire, “Mûthiani Mwathani agûtûrûthîra mwanya ûmûganu wa kûthi na mbere nthîgûrû îno.”

23 Kuuma agu aathi mwanka Beeriseba. 24 Ûtugû bûbu Mwathani amuumîîra amwîra, “I niû Ngai wa abaagu Îburaîmu. Ûtikaamake, n'ûntû ndî amwe naawe; ngakûthaarima na nkaathagayia nciarwa ciaku n'ûntû bwa mûruti ngûgî wakwa Îburaîmu.” 25 Isaka aaka kîthînjîro agu na aagonga Mwathani. Aamba îrema rîake agu, na aruti ngûgî baake beenja kîthima waagu.

Isaka aarûtha kîrîîkanîro na Abimereki

26 Rîru Abimereki aathi kîrî we aumîîte Gerari barî na Ausathi mûtaari wake na Fikori mûtongoria wa njûûrî yake. 27 Isaka abaûria, “I kî n'ûntû bwaya kîrî niû, nkîonaga bûra bûûmeneete na i bwambîîngatiirie kwenu?” 28 Baacookia, “Itûkwona bwega atî Mwathani arî amwe naawe; kwoogu twauga, kwîthîrwe kûrî na muuma gatîgatî gaaku na tiû, na ga tûrûthe kîrîîkanîro naawe, 29 ûtitûrûthîra ûthûûku, wa ta bûra tûtaabwinyîîria, îndî rîonthe twabûrûthaga bwega na twakwîra ûthi na thîîrî. Na îîndî ûrî ûmûthaarime i Mwathani.”

30 Rîru Isaka abarûthîra kîatho, baarîa na baanyua. 31 Rûûni rûkîîrî baanyua muuma baathiîtanîria. Rîru Isaka abarekeeria baathi, na bauma kîrî we na thîîrî. 32 Ntugû wa înu aruti ngûgî ba Isaka baaya bamwîra mantû ma kîthima kîra beenjîîte. Bamwîra, “Tûkwona rûûyî.” 33 Agîîta Siba, kwoogu riîtwa rîa ntûûra înu kinya îmunthî tûrî rîîtagwa Beeriseba.

34 Rîra Esaû aakinyiirie mîanka mîrongo înna, aagûrire Njundîthi mwarî wa Beeri Mûiti, na Basemathi mwarî wa Eroni Mûiti. 35 Îndî eekûrû baba baîrî beekîra Isaka na Rebeka kîrikithi kîînene mûno gîa nkoro.