Nciarwa cia Îburaîmu
(1Karaaya 1:32-33)
25
1 Îburaîmu aagûra mwekûrû ûngî eetagwa Ketura. 2 Amûciarîra Simurani, Njokisani, Mendani, Mindiani, Isibaki na Sua. 3 Njokisani aarî îthe wa Seba na Ndendani; nciarwa cia Ndendani ciarî Aasuuri, Aretusimu na Areumimu. 4 Aana ba Mindiani baarî Efa, Eferi, Anoki, Abinda na Erindaa. Ino cionthe ciarî nciarwa cia Ketura.5 Rîra Îburaîmu aakuire, aatigîîre Isaka bionthe bira aarî nabio. 6 Îndî rîra aarî mwoyo, naaneenkeere aana ba eekûrû bara bangî ba kwaiga biewa na abeengatia baategategera Isaka baathi bwa umîîro bwa riûa.
Gûkua kwa Îburaîmu
7 Îburaîmu aatûûrire mîanka îgana rîa mîrongo mûgwanja na îtaano. 8 Na aakua arî mûkûûrûkûrû, aagwatana na booyûûe. 9 Aana baake Isaka na Isumairi bamûthika îkurunguuni rîa Makipera, akubî na Mamure, mûndaani wa Eburoni mwana wa Soari ûra Mûiti. 10 Warî mûnda ûra Îburaîmu aagûrîîte kuuma kîrî Aiti; Îburaîmu aathikirwe oogo amwe na mwekûrû wake Saara. 11 Nyuma ya gûkua kwa Îburaîmu, Ngai aathaarima Isaka mwan'wake. Na Isaka aatûûra akubî na Beeri-Raai-Roi.
Nciarwa cia Isumairi
(1Karaaya 1:28-31)
12 Ino i cio nciarwa cia Isumairi, mwana wa Îburaîmu, ûra Agari ûra Mûmiisiri, mûruti ngûgî wa Saara, aaciarîîre Îburaîmu. 13 Mariîtwa ma aana ba Isumairi maandîkîîtwe aaga kûringana na bûra baaciarirwe: Nebaiothi, mwana ûra mûkûrû, Kendari, Andibeeri, Mibusamu, 14 Misima, Nduma, Masa, 15 Andandi, Tema, Njeturi, Nafisi, na Kendema. 16 Aana ba Isumairi bonthe baarî atongoria na wa riîtwa rîa kîra ûmwe wabo îriatuîkire riîtwa rîa ntûûra nna. 17 Isumairi aakuire arî na ûkûrû bwa mîanka Îgana na mîrongo îthatû na mûgwanja. 18 Nciarwa ciake ciatûûrire kuuma Abira mwanka Suri, akubî na mwanka wa Miisiri, ta ûthiîte bwa Asîîria. Aatûûrire atakûgwatanîra na antû baao.
Njakubu na Esaû
19 Rûrû i ru rûgono rwa mûciî wa Isaka, mwana wa Îburaîmu: Îburaîmu aarî îthe wa Isaka, 20 na Isaka aarî na ûkûrû bwa mîanka mîrongo îna rîra aagûrire Rebeka, mwarî wa Bethueri Mûaramu wa Pandani-Aramu, mwaragina wa Rabani. 21 Na Isaka aarombera mwekûrû wake, n'ûntû aarî nthaata; na Mwathani eegua îromba rîake, Rebeka mwekûrû wake aagîa na nda. 22 Mbere Rebeka agîa na mwana, naiyî akaagîa na maatha, n'ûntû neegagua bakîrûa barî nda. Na aûria, “I mbi n'ûntû gûgûkarîka ûûgû kîrî niû?” Kwoogu aathi kûûria ûkûrû kuuma kîrî Mwathani.
23 Mwathani amwîra,
“Mîgongo îîrî îrî nda yaku,
na antû baîrî bara barî ndeeni yaku bakaathûranwa;
Ûmwe akeegua arî na inya nkûrûki ya ûra ûngî,
na ûra mûkûrû agaatûmîkîra ûra mûniini.”
24 Kagiita gaake ga kuurûka gagûkinya, i kwarî na twîyî twa maatha nda yake. 25 Kara koonire werû karî ka mbere, kaarî gaatuune tunî, na mwîrî wako unthe waûyûrîîtwe i guaya ta rûûo. Kwoogu bageeta Esaû.a 26 Nyumaani mûruagina auma, na njara yake îgwete gateende ga Esaû; kwoogu eetwa Njakubu.b Isaka aarî na ûkûrû bwa mîanka mîrongo îthanthatû aana babu bagîciarwa.
27 Rîra twana tûtu twakûrire, Esaû atuîka mwathi wa ngûtî, muntû wa kîthaka, Njakubu n'we aarî muntû ûmûkirîîru, aatûûraga maremaani. 28 Isaka neendeete Esaû, n'ûntû naarîîyaga nyama ciake cia ûguîmi; îndî Rebeka we eendeete Njakubu.
29 Ntugû îmwe Njakubu akîrugaga gîcau, Esaû aaya mûciî aumîîte kîthakaani, na n'aabûûti mûno. 30 Esaû eera Njakubu, “Ndî na yûûra mûno! Ndûmia irio bibu biaku bituunîîte ûgu.” (Kwoogu eetwa Endomu) 31 Njakubu amwîra, “Amba ûmbeenderie ûtûra îria bwaku.” 32 Esaû n'we amwîra, “Ndî akubî gûkua; ûtûra îria bwakwa bûrî na gîtûmi kîbi?” 33 Njakubu amwîra, “Nthiîtîria mbere.” Kwoogu amûthiîtîria, na eendia ûtûra îria bwake kîrî Njakubu. 34 Rîru Njakubu aapa Esaû gîcau kîa nthoroko na mûgaate. Akûrîa na aanyua, aûka eethiîra. Ûgu i bu Esaû aabûthangiirie ûtûra îria bwake.