Isaka aagûra Rebeka
24
1 Îburaîmu naarî agûkûra mûno, na Mwathani naarî akûmûthaarima na njîra cionthe. 2 Îburaîmu eera mûruti ngûgî wake, ûra aarî mûkûrû mûciî wake, ûra aarûgamîrîîte bionthe bira aarî nabio, “Ira njara yaku ruungu rwa kîero gîakwa. 3 Ndîenda ûthiîtia na riîtwa rîa Mwathani, Ngai wa îgûrû na nthî, ûtiithuurîra nthaka yakwa mwekûrû kuuma kîrî aarî ba Akanaani, bara ntûûranîrîîte nabo, 4 îndî ûkaathi nthîgûrû yetû na kîrî antû ba rûkore rwetû na ûthûkîrie mwan'wakwa Isaka mwekûrû.”5 Mûruti ngûgî ûyu amûûria, “Î ûkeegua mwarî ûyu atienda gûcooka naani nthîgûrû îno? I ka ngaacookia nthaka yaku noogo?”
6 Îburaîmu amûkaania amwîra, “Arî, ûmenyeere ûtikaire mwan'wakwa naagu. 7 N'ûntû Mwathani, Ngai wa îgûrû, ûra aandutire kwa baaba na nthîgûrû yetû, n'ampeere wîrane na mûthiîtio ambîîra akaaneenkera nciarwa ciakwa nthîgûrû îno. Agaatûma mûraîka wake mbere yaku, na akoona ûkwona mwarî noogo wa gûtuîka mwekûrû wa mwan'wakwa. 8 Wegua atienda gûcooka naawe, rîru ûrî ûmûthaûre kuumania na mûthiîtio ûyû. Îndî bunka ûtigaacookie mwan'wakwa noogo.” 9 Kwoogu mûruti ngûgî ûra eekîra njara yake ruungu rwa kîero kîa mwathi wake Îburaîmu na amûthiîtîria îgûrû rîa ûntû bûbû.
10 Rîru mûruti ngûgî ûyu aathûkia nkamîîra îkûmi cia mwathi wake na aathûkia into bira biega mûno bia mîthemba yonthe kuuma kîrî mwathi wake. Aathi Mesopotamia, ntûûra ya Naori. 11 Agu mûruti ngûgî ûra aatûma nkamîîra ituria maru rûteere rwa kîthima wagu ome ya ntûûra. Kwarî ûgoro, na eekûrû i baayaga gûtaa rûûyî.
12 Rîru aaromba auga, “Îî Mwathani, Ngai wa mwathi wakwa Îburaîmu, mpa kûûmbana îmunthî, na wonanie wendo bwaku bûra bûtathiraga kîrî Mwathi wakwa Îburaîmu. 13 Ene, ndûûngi rûteere rwa kîthima gîkî, na aarî ba ntûûra i baayîîte gûtaa rûûyî. 14 Reka mwarî ûra nkeera, ‘Itû îndamîîria gîkuru gîaku nyue rûûyî,’ na auge, ‘Înyua, na ngaataîra kinya nkamîîra ciaku,’ tiga wîthîrwe n'we ûthuurîrîîte mûruti ngûgî waku Isaka. Na n'ûntû bwa ûûgû nkaamenya nwonanîîtie wendo bwaku bûra bûtathiraga kîrî mwathi wakwa.”
15 Mbere arîîkia kûromba, mwarî aumîîra na gîkuru kîrî gîturo. Eetawa Rebeka na aarî mwarî wa Bethueri mwana wa Mirika, ûra aarî mwekûrû wa mûruagina wa Îburaîmu Naori. 16 Aarî mwarî ûmûthongi mûno, ataamaamîîte na muntû mûrûme. Aathi kîthimaani, aataîrîîra gîkuru gîake aumîra kaîrî. 17 Mûruti ngûgî wa Îburaîmu augia kîrî we amwîra, “Itû nkundia tûûyî tûniini kuuma gîkuruuni gîaku.” 18 Aacookia, “Înyua, mwathi wakwa” na nthûti îmwe aûra gîkuru akîgwata na njara, amûkuundia rûûyî. 19 Akûrîîkia kûmûkuundia, amwîra, “Ngaataîra nkamîîra ciaku kinya cio, mwanka inyue ibûûtûge.” 20 Kwoogu oonoria rûûyî rûra rwarî gîkuruuni rûkongorooni na mpwî na aacooka kîthimaani gûtaa kaîrî, aataîra nkamîîra ciake cionthe. 21 Muntû ûyu aakara amûraithîîte kii atakwaria oona wegua Mwathani na mûûmbanîra rûgendooni rwake kana arî. 22 Rîra nkamîîra ciarîîkiirie kûnyua, muntû ûyu aathûkia mbete ya thaabu ya ûrito bwa nucu sekeri, na mbangiri ciîrî cia njara ciake cia thaabu cia ûrito bwa sekeri îkûmi, 23 amwîra, “Mbîîra, ûrî mwarî waû? Kûrî na kanyomba mûciî wa abaagu tûûmba kûraara?” 24 Rebeka amwîra, “Baaba eetagwa Bethueri, mwana ûra Mirika aaciarîîre Naori. 25 Yîî, tûrî na rûûa rwa kûgana na biakûrîa bia kûgana bia nkamîîra, na tûrî na nyomba ya ageni.”
26 Muntû ûyu eendamîîria kîongo gîake aagonga Mwathani, 27 auga, “Mwathani arookumua, n'we Ngai wa mwathi wakwa Îburaîmu, ûra atatiganîrîtie wendo bwake bûra bûtathiraga na wîtîgîka gwake kîrî mwathi wakwa. Aakwa, Mwathani agûntongoria rûgeendoni rwa kûthi mûciî wa ndûgû cia mwathi wakwa.”
28 Mwarî ûyu augia rwîro eenûka mûciî kwîra antû mantû mamu. 29 Îîndî Rebeka n'arî na mûruagina ûmûkûrû eetagwa Rabani. Rabani aumagarûka na rwîro aathi kînyakaani ara mûruti ngûgî ûyu wa Îburaîmu aarî. 30 Rîra oonire mbete ya nyiûrû na mbangiri irî njara cia mwaragina, na rîra eegiirue akîeyana rûgono, aumagarûka augia kîthimaani, ara muntû ûra aarûûngi rûteere rwa nkamîîra ciake. 31 Rabani amwîra, “Ncû ûkare naati, woû mûthaarime i Mwathani. I kî n'ûntû ûrûngi aaga ome ya ntûûra na kûrî na nyomba îrî oogo, îthuuranîrîtwe n'ûntû bwaku, na bantû aathuuranîre n'ûntû bwa nkamîîra ciaku!”
32 Kwoogu muntû ûyu aathi mûciî, na Rabani aûra Nkamîîra mîrigo, acirutîra matî ma kûmaamîra, rûûa rwa kûrîa; aareeta rûûyî kaingo we na antû bara aarî nabo bathamba magûrû. 33 Muntû ûyu akûreterwa irio, auga, “Ntiirîa ntaambîîte kûbwîra bûra nkûyîîte kuuga.” Rabani n'we amwîra, “Twîre ni.”
34 Kwoogu auga, “Ndî mûruti ngûgî wa Îburaîmu. 35 Na Mwathani n'athaarimîîte mwathi wakwa mûno; n'atuîkîîte muntû ûmûtongu. Namwete ng'ondu na ng'ombe, thaabu na fetha, aruti ngûgî ba antû arûme na aka, na nkamîîra na mang'ooi. 36 Saara mwekûrû wa mwathi wakwa naamûciarîîre kaîyî arî mûkûûrûkûrû, na mwathi wakwa n'akaneenkereete bionthe bira arî nabio. 37 Mwathi wakwa naambîîrire nthiîtie, na auga, ‘Ûtikaagûrîre mwan'wakwa mwekûrû kuumania na aarî ba Akanaani, ba nthî îno ntwîre, 38 îndî îthi mûciî wa baaba na mwîrîgaani wetû, ûthûkîrie mwan'wakwa mwekûrû ku.’
39 “Rîru ndaûria mwathi wakwa, ‘Î ûkeegua mwarî ûyu atienda tûûya n'we?’ 40 Aancookeria, ‘Mwathani, ûra mbathîkagîra rîonthe, agaatûma mûraîka wake athiyanie naawe na agakwa kûûmbana. Ûkaathuurîra mwan'wakwa mwekûrû kuuma kîrî antû beetû, kuuma mûciî wa baaba. 41 Îndî ûkaaya kûthi kîrî antû beetû na bakarega kûmûrekeeria aaya, ûkeegua ûrî mûtharie kuumania na mûthiîtio waku.’
42 “Kwoogu ûgoro bûbû rîra mbûyire kîthimaani indombire îromba rîrî, ‘Îî Mwathani, Ngai wa mwathi wakwa Îburaîmu, wegua nûkûbanga kûûmbithia mûbango wakwa, itû ntongoria na njîra ya mwanya. 43 Raitha, ndûûngi rûteere rwa kîthima gîkî; mwarî ûra akaaya gûtaa rûûyî na mmwîre, “Itû nkundia tûûyî tûniini twa gîkuru gîaku nyue,” 44 n'we aambîîre, “Înyua, na ngaataîra kinya nkamîîra ciaku,” tiga eegue n'we Mwathani athuurîrîîte nthaka ya mwathi wakwa.’
45 “Mbere ndîîkia kûromba na nkoro, Rebeka aaya, na gîkuru gîake kîrî gîturo. Eendama kînyakaani aataa rûûyî, na ndamwîra, ‘Itû nkundia rûûyî.’ 46 Nthûti îmwe aaruta gîkuru gîake gîturo ambîîra, ‘Înyua, na ngaataîra kinya nkamîîra ciaku.’ Kwoogu ndanyua, na aakundia kinya nkamîîra.
47 “Rîru ndamûûria, ‘Ûrî mwarî waû?’ Ambîîra, ‘Ndî mwarî wa Bethueri mwana wa Naori na Mirika.’ Rîru ndamwîkîra mbete nyiûrû na mbangiri njara ciake, 48 na ndaaturia maru ndaagonga Mwathani. Ndaakumia Mwathani, Ngai wa mwathi wakwa Îburaîmu, n'ûntû naantongorereetie njîraani îra mbega mbona mwekûrû kuuma mûciî wa ndûgû cia ba mwathi wakwa. 49 Îîndî wegua ûkoonania kîao na wîtîgîka kîrî mwathi wakwa, mbîîra; na wegua ûtionania ûmbîîre, kaingo menya i njîra îrîkû nkûthi.”
50 Rîru Rabani na Bethueri baacookia bauga, “Ûntû bûbû buumîîte kîrî Mwathani, gûtirî bu tûkwîra bwega kana bûûthûûku. 51 N'ûûyû Rebeka, mûthûkieni bûthi, na atuîke mwekûrû wa mûthaka wa mwathi waku, wa ta bûra Mwathani aarîîtie.”
52 Rîra mûruti ngûgî wa Îburaîmu eegiirue bûra bauga, eendamîîria ûthiû bwake nthî mbere ya Mwathani. 53 Na mûruti ngûgî ûyu aarutîra Rebeka mîkathî ya thaabu na fetha na nguo ira nthongi. Aaneenkera kinya gina wa Rebeka na mûruagina biewa bia goro. 54 Rîru we na antû bara aarî nabo baarîa na baanyua na baaraara agu. Bagûûkîîra rûkîîrî, mûruti ngûgî wa Îburaîmu auga, “Ntûma kîrî mwathi wakwa.”
55 Îndî gina na mûruagina baacookia, “Ga tûtigwe na Rebeka akaraange naati ta ntugû îkûmi ûgu; rîru nwa athi.”
56 Îndî abeera, “Tigaani kûngiria nthi, n'ûntû Mwathani n'ampeete kûûmbana rûgendooni rwakwa. Mpaani rûûtha ncooke kwa mwathi wakwa.”
57 Baacookia bamwîra, “Ga twîte Rebeka twîgue bûra akuuga.” 58 Kwoogu beeta Rebeka bamûûria, “Bûkaathi na muntû ûyû?”
Auga, “Yîî.”
59 Kwoogu baarekeeria Rebeka na mûruti ngûgî wake baathi amwe na mûruti ngûgî wa Îburaîmu na antû baake. 60 Na baathaarima Rebeka bamwîra, “Mwarayia, ûrootuîka gina wa ngiri na ngiri; na nciarwa ciaku iroocinda baao bonthe!” 61 Rîru Rebeka na aruti ngûgî baake bara kinya bo baarî amwe nwe, beethuuranîra baatwa nkamîîra ciao baacooka na mûruti ngûgî wa Îburaîmu na antû baake.
62 Rîru Isaka naarî akûûya kuuma naara aatwîre Beeri-Raai-Roi ndeeni ya Negebu. 63 Na Isaka aumagarûka naagu mîndaani ûgoro kûthûgaania, na agûûkîîria meetho maake, oona nkamîîra ciiyîîte. 64 Rebeka akûraitha oona Isaka aayîîte, aakinyûka kuuma nkamîîraani yake 65 aûria mûruti ngûgî, “N'ûû ûûra arî mûndaani aayîîte gûtûthagaana?”
Mûruti ngûgî amwîra, “I mwathi wakwa.” Kwoogu Rebeka aakunîkîra ûthiû bwake na gîtambaa.